Marawi narcolist matrix iimbestigahan na ng PNP
MANILA, Philippines — Iimbestigahan ng Philippine National Police ang drug matrix ng mga pulitikong sinasabing nagpondo sa rebelyon sa Marawi City.
Ang hakbang ay kaugnay naman na isiniwalat ni Pangulong Rodrigo Duterte na mga narco-politicians umano kabilang ang napatay na si dating Ozamis City Mayor Reynaldo “Aldong“ Parojinog ang nagpondo ng rebelyon ng Maute terror group.
Ang pagbubunyag sa panibagong drug matrix ay ginawa ni Pangulong Rodrigo Duterte sa kaniyang ika-5 beses na pagbisita sa Marawi City kung saan halos apat na buwan na ang krisis kaugnay ng patuloy na bakbakan ng militar at ng Maute –ISIS.
Nabatid na kabilang sa mga narco-politicians na sinasabing nagpondo sa rebelde ay kinasasangkutan din ng mga mayor at bise alkalde sa Lanao del Sur.
Binigyang diin ni PNP Spokesman P/ Chief Supt. Dionardo Carlos na sa pamamagitan ng money trail ay inaalam na ng mga imbestigador kung ano ang naging ugnayan ng mga drug lords at mga pulitiko sa Maute-ISIS terror group.
Samantala, tinutukoy din sa bagong drug matrix ay ang dating alkalde ng Marawi City na si Omar Solitario na mayroon na ring arrest order mula sa Defense department.
Si Solitario ay una nang tumanggi sa paratang at nag-alok na tutulong sa pagresolba sa krisis sa kanilang siyudad.
“Kasi tingnan niyo kung affected sila sa buong bansa, its a business for them, however this is illicit, bawal so they would do anything para mag-survive o magpatuloy ang kanilang illegal activity and the protection that can be given by these terror groups. Isa ‘yan sa mga possible nilang kunin yung funding the activity of the terror groups”, giit pa ni Carlos.
- Latest
