P1K budget ng 3 ahensiya binawi ng Kamara
MANILA, Philippines — Binawi na ng Kamara ang desisyon nito na bigyan lang ng tig-P1,000 budget ang Commission on Human Rights (CHR), Energy Regulatory Commission (ERC) at National Commission for Indigenous People (NCIP).
Ayon kay House Appropriations Committee chairman Karlo Nograles, na binigyan na sila ng go signal para ibalik ang pondo ng tatlo matapos na makipag-usap ang pinuno ng nasabing mga ahensiya kay House Speaker Pantaleon Alvarez.
Paliwanag pa ni Nograles na humingi ng tulong sina CHR Chair Chito Gascon, ERC Commissioner Geronimo Sta. Ana at NCIP Chair Leornor Oralde-Quintayo kay Majority Leader Rodolfo Fariñas at Nograles para maging tulay kay Alvarez.
Sa nasabing pulong ay sumang-ayon umano si Gascon na palawigin pa ng CHR ang imbestigasyon ng hanggang sa mga pulis, militar at sibilyan na biktima ng human rights violations.
Sa panig naman ng ERC at NCIP, sinabi ni Nograles na tiniyak nila na gagawin ang lahat para labanan ang graft and corruption at matupad ang mandato ng kani-kanilang tanggapan.
Ang pondo ng CHR para sa 2018 ay P678 milyon, samantalang sa ERC ay P390.5 milyon at P1.1 bilyon naman sa NCIP.
- Latest
