Ilang miyembro ng Aegis Juris tumakas na – Zubiri

MANILA, Philippines — Nakatanggap ng ulat si Sen. Juan Miguel Zubiri na nakalabas na ng bansa ang ilang miyembro ng Aegis Juris, ang fraternity na itinuturong responsable sa pagkamatay ni Horacio “Atio” Castillo III, ang law student ng University of Sto. Tomas (UST).

Sa kanyang privilege speech, tungkol sa pagkamatay ni Castillo, hini­ling ni Zubiri sa Bureau of Immigration na ilagay na sa watchlist o kaya ay sa hold departure order ang mga miyembro ng Aegis Juris.

“I have also received reports that the members of the Aegis Juris fraternity were told to leave the country or probably some may have already left the country, thus I call on our authorities to place them under watch list or on hold departure order by the Bureau of Immigration,” sabi ni Zubiri sa kanyang talumpati.

Isiniwalat rin ni Zubiri na matagal na niyang kaibigan ang ama ni Castillo samantalang ang anak naman nitong si Nicole ay  ilang linggo nang nagta-trabaho bilang ‘on the job training’ o OJT sa kanyang tanggapan.

Sinabi ni Zubiri na walang sinuman ang nararapat na mamatay sa pamamagitan ng hazing lalo na ang isang katulad ni Castillo na marami pang mga pangarap sa buhay at ninais ding ma­ging senador.

“Mr. President, no one, I repeat no one, deserves to die from hazing…so much senseless deaths, my dearest colleagues, so much wasted youth, the bright future of these students suddenly gone, as was the case of Atio Castillo,” ani Zubiri.

Duda rin si Zubiri sa naging hakbang ni Dean Nilo Divina ng UST Fa­culty of Civil Law  na sinuspinde ang mga miyembro ng Aegis Juris upang hindi sila makadalo sa kanilang klase at makapasok sa loob ng UST.

Ayon kay Zubiri, dahil sa naging hakbang ni Divina, nahihirapan na ang mga imbestigador na hagilapin ang mga miyembro ng fraternity.

“This was echoed by the Manila Police District officers in their press briefing this morning. This I challenge Dean Divina and other faculty members of the UST Faculty of Civil Law who are also members of the Aegis Juris to cooperate in the investigation and to tell all that they know about the incident,” ani Zubiri.

Kaugnay nito, inihain ni Zubiri ang Se­nate Resolution No. 504 na nagpapahayag ng pagkondena ng buong Senado sa nangyaring pagkamatay ni Castillo.