Ceremonial markings ng Manila-Clark railway project isinagawa

MANILA, Philippines - Pinangunahan ni Department of Transportation (DOTr) Sec. Arthur Tugade ang pagdaraos ng ceremonial markings sa mga lugar na pagtatayuan ng lima sa 17 istasyon ng Manila-Clark Railway project, na siyang magkokonekta sa Metro Manila at Central Luzon.

Nabatid na kabilang sa mga lugar na minarkahan ay ang pagtatayuan ng mga istasyon sa Marilao, Meycauayan at Valen­zuela sa Bulacan; gayundin ang Caloocan at Tutuban sa Maynila.

Bukod naman dito, magtatalaga rin ng mga istasyon sa Solis (Tondo), Bocaue, Balagtas, Guiguinto, Malolos, Calumpit, Apalit, San Fernando, Angeles, Clark, Clark International Airport, at ang iminumungkahing New Clark City sa Pampanga.

Ayon kay Tugade, ang naturang 106-km railway project ay bahagi ng “Build, Build, Build” infrastructure program ng administrasyong Duterte.

Tinatayang aabot sa 350,000 pasahero kada araw ang makikinabang sa unang taon pa lang ng linya, na nagkakahalaga ng P255 bilyon, at popondohan sa pamamagitan ng Official Development Assistance (ODA) mula Japan.

Target ng DOTr na masimulan ang konstruksyon ng linya sa Setyembre upang matapos ito sa huling bahagi ng 2021, o bago matapos ang termino ni Pangulong Rodrigo Duterte.