Aguirre ginagamit ang pwesto upang ipakulong ang oposisyon – Trillanes

MANILA, Philippines – Itinanggi ni Sen. Antonio Trillanes IV na may kinalaman siya sa pork barrel scam, kasunod ng planong pagsasampa ng kaso ng tinaguriang mastermind Janet Lim Napoles.

Sinabi ni Trillanes na wala siyang kinalaman sa mga maaanomalyang paggamit ng pondo ng gobyerno kabilang ang Priority Development Assistance Fund o Disbursement Acceleration Program.

I categorically deny any involvement in any irregularity regarding PDAF, DAP or any government funds, for that matter,” pahayag ng Trillanes na pinakamahirap na senador base sa inihaing statement of liabilities and net worth.

“I was never even mentioned in any of the so-called Napoles lists provided during the height of the investigations in 2013,” dagdag niya.

Ngayong umaga lamang sa isang panayam sa telebisyon ay sinabi ni Justice Secretary Vitaliano Aguirre na nakausap niya ang abogado ni Napoles at ipinaalam sa kaniya ang planong pagsasampa ng kaso sa tatlong senador at isang dating kalihim.

Kabilang dito si Trillanes gayundin ang mga kasamahan sa minorya ng senado na sina Sen. Leila de Lima at Sen. Franklin Drilon, habang idadawit din si dating Budget Sec. Butch Abad.

BASAHIN: Aguirre: Trillanes, De Lima, Drilon, Abad kakasuhan ni Napoles sa pork scam

Para kay Trillanes, ginagamit umano ni Aguirre ang kaniyang pwesto upang habulin ang kalaban ng administrasyon.

Aniya hindi ito ang unang beses dahil nagawa na rin ito sa pagpapakulong kay de Lima nang pagbasehan ang salaysay ng high-profile inmates at drug lords ng Bilibid.

“Aguirre has been using his office to persecute and harass members of the opposition by fabricating testimonies from dubious convicts or detainees such as the Bilibid drug lords, Kerwin Espinosa and now Napoles,” wika ni Trillanes na kilalang kritiko ni Pangulong Rodrigo Duterte.