Bagyong Igme, papasok sa bansa
MANILA, Philippines - Papasok sa bansa ngayong Sabado ang bagong bagyo na tatawaging Igme.
Si Igme ang dating bagyo na may foreign name na Chaba.
Kahapon alas -11 ng umaga, ang bagyo ay namataan sa layong 1500 kilometro ng silangan ng Southern Luzon taglay ang lakas ng hangin na umaabot sa 85 kilometro bawat oras at may pagbugso ng hangin na umaabot sa 105 kilometro bawat oras.
Kumikilos ito pakanluran hilagang kanluran sa bilis na 20 kilometro bawat oras.
Oras na pumasok sa bansa, ayon sa PagAsa, hindi naman ito direktahang makakaapekto sa ating bansa.
Bagamat patuloy ang paghina ng habagat, patuloy naman nitong pinaiigting ang isang low pressure area kayat mayroon pa ring mga pag- uulan sa Metro Manila, Ilocos Region, Cordillera, Cagayan Valley, Central Luzon, Calabarzon at sa lalawigan ng Mindoro.
Kahapon ng alas -11 ng umaga, ang LPA ay namataan ng PagAsa sa layong 230 kilometro sa silangan ng Tuguegarao City. Hindi pa kinakikitaan na ang LPA ay magiging isang ganap na bagyo.
- Latest