Duterte sa maling pagdawit sa Pangasinan execs sa ‘narco list’: I am sorry

MANILA, Philippines — Humingi ng paumanhin si Pangulong Rodrigo Duterte sa pagdawit sa iba’t ibang opisyal ng lalawigan ng Pangasinan sa listahan ng mga may kinalaman umano sa ilegal na droga.

Sinabi ni Duterte na sa kabila ng apat na beses na pagberepika ng listahan ay nagkamali siya sa pagdawit kina dating Pangasinan governor at ngayo’y Pangasinan Rep. Amado Espino Jr., Pangasinan Provincial Administrator Rafael "Raffy" Baraan at Pangasinan Board Member Raul Sison.

“But insofar as the drug, I think that somehow we were negligent in counterchecking during the first report. So kay Espino, and even to Sison at kay Baraan, 'yung kapatid, ('wag 'yung undersecretary sabit talaga 'yun), I would like to apologize to you publicly. And I would say now I am very sorry,” wika ni Duterte matapos ang pagbisita sa hinihinalang shabu laboratory sa Pampanga.

“But trabaho ko 'yan, it's part of my territory, I cannot be perfect and sometimes you are correct when you say that life is never fair,” dagdag niya.

BASAHIN: Duterte kay Sereno: Sorry

Aniya ilang gabi niyang pinag-aralan kung paano nasabit ang Pangasinan officials sa ilegal na droga sa New Bilibid Prison ngunit mayroon siyang nakitang kakulangan na hinid maipaliwanag.

“I take full responsibility. Ako 'yung nag-announce, hindi naman (sila). Sabi ko... I take full responsibility, even if the soldiers and the police would commit a serious wrong, I will assume that mistake. And they can file charges at me, fine. But my answer to the judge would really be something like, 'Nagkamali ako, I am sorry but I have to inform the people immediately so that they can take regard of their surroundings and prevent the contamination of drugs,'” ani ng Pangulo.

Sa kabila nito ay iginiit ni Duterte na maliban kina Espino, Baraan at Sison, ang lahat ng idinawit niya ay totoong may kinalaman sa ilegal na droga.

Kasama ang Pangasinan officials sa isiniwalat ni Duterte noong Agosto 25 sa ‘narco list’ kung saan dawit din sina Sen. Leila de Lima, dating driver ng senadorang si Ronie Dayan, dating Justice Undersecretary Francisco "Toti" Baraan III, at retired Gen. Franklin Bucayo.

“Hindi ako (ma-pride) na tao. Masama nga ang bunganga ko, pero 'pag ako nagkamali, it comes from the heart, I am very sorry,” sabi ni Duterte.

Samantala, kahit nagkamali ay maglalabas pa rin ng panibagong listahan si Duterte kapag nakabalik na siya mula Vietnam.

Ayon sa ilang opisyal ng gobyerno ay may 50 celebrities ang kabilang sa listahan.a