Ceasefire binawi na ni Digong

MANILA, Philippines – Tuluyan nang binawi kagabi ni Pangulong Rodrigo Duterte ang idineklarang unilateral ceasefire sa Communist Party of the Philippines-New People’s Army (CPP-NPA) matapos hindi tumugon sa itinakdang 5 p.m deadline para magdeklara rin ng ceasefire ang makakaliwang grupo.

Sa ipinalabas na pahayag, sinabi ng Pangulo ng binabawi na niya ang unilateral ceasefire sa mga rebelde na inihayag niya noong Hulyo 25 sa kanyang State of the Nation Address (SONA).

“Let me now announce that i am hereby ordering for the immediate lifting of the unilateral ceasefire that I ordered last July 25 against the communist rebels,” ani Duterte.

Kasabay nito, ipinag-utos ng Pangulo sa Armed Forces of the Philippines at sa Philippine National Police na bawiin ang ipinalabas na operational guidelines para sa ceasefire declaration.

“Correspondingly, I am ordering the Armed Forces of the Philippines and the Philippine National Police to also withdraw the operational guidelines they issued in pursuance to that ceasefire declaration,” pahayag ni Duterte.

Ipinag-utos rin ng Pa­ngulo sa security forces na maging mas alerto at ipagpatuloy ang pagtupad ng kanilang  tungkulin at pigilan ang anumang banta laban sa seguridad ng bansa at protektahan ang mga mamamayan.

Ipinag-utos rin ng Pangulo na sa mga awtoridad na ipatupad ang batas at panatilihin ang katahimihan sa bansa.

“I am ordering all security forces to be on high alert and continue to discharge their normal functions and mandate to neutralize all threats to national security, protect the citizenry, enforce the laws and maintain peace in the land,” anang Pangulo.

Samantala siniguro naman kahapon ni Presidential Adviser on the Peace Process Jesus Dureza na magpapatuloy ang usapang pang­kapayapaan sa pagitan ng gobyerno at ng Communist Party of the Philippines-National De­mocratic Front (CPP-NDF) kahit pa walang umiiral na ceasefire.

Natapos ang ultimatum ng Pangulo kahapon ng alas-5 ng hapon na walang naririnig na pahayag mula sa CPP at sa armed group nitong New People’s Army (NPA).

Pero ayon kay Dureza, wala itong magiging epekto sa pagpapatuloy ng peace talks sa Oslo, Norway sa susunod na buwan.