Dog show ng AKCUPI sa Valentine’s Day

MANILA, Philippines – Isang makulay at makabuluhang pagtatanghal ang handog sa ‘Araw ng mga Puso’ para sa dog lo­vers ng Asian Kennel Club Union of the Philippines, Inc. (AKCUPI) sa pagsasagawa nito ng ika-67 at ika-68 International All-Breed Championship Dog Show, “My Furry Valentine” sa Linggo, Pebrero 14  sa Tiendesitas en Frontera Verde sa Ortigas Avenue, Pasig City.   

Ang pagtatanghal, na isasagawa sa pakikipagtulungan ng Asia Pacific Sporting Dog Club of the Philippines, Inc., Labrador Retriever Owners Club at Pets for Peace ay may dalawang bahagi. Ang unang bahagi sa umaga ay kinabibilangan ng T-shirt painting contest at Costume Fashion Contest. Ang ikalawang bahagi sa hapon, na magsisimula ng ika-1:00, ay tatampukan ng back-to-back All-Breed Championship Dog Shows na huhusgahan ng Filipino judges na sina Fe Lanny Alegado at Edgard Gacula na may kanya-kanyang set ng magwawagi sa Best Baby Puppy, Best Philippine-born at Best in Show categories mula sa pitong breed groupings - toy, sporting, hound, terrier, non-sporting, working at herding.  Si Alegado ay nagbi-breed, nagsasanay, nageexhibit at nangangampanya ng ilang mga breeds upang umabot sa Philippine championships at grand championships, lalu na Jack Russels at German Shepherd dogs. Si Gacula naman ay nanungkulan bilang pangulo ng K-9 Taconphil Handlers Association of the Philippines at nagtrabaho sa loob ng dalawang dekada bilang chief trainer ng PET Hotel sa Singapore. Sa kasalukuyan, siya ang executive vice president ng Canine Handlers and Trainers Association of the Philippines (CHATAP). 

Para sa dagdag na kaalaman, tumawag sa AKCUPI office, tel. 3766597 o bisitahin ang website:www.akcupi.com.