SK elections sa Okt. 2016 na
MANILA, Philippines - Lusot na sa Senado ang panukalang ipagpaliban ang Sangguniang Kabataan (SK) elections na nakatakda sana ngayong Pebrero.
Sa halip na ngayong taon, planong isagawa ang SK elections sa Oktubre 2016 kasabay ng barangay elections.
Una ng ipinagpaliban ang halalan noong Oktubre 2013 at ginawa itong Pebrero 21, 2015.
Ayon kay Sen. Bongbong Marcos, chairman ng Senate Committee on Local Government, inaprubahan ng komite ang panukala at nakatakda itong isalang sa plenaryo sa susunod na linggo.
Sumang-ayon si Marcos sa mga kasamahang mambabatas sa House of Representatives na nanawagan ring ipagpaliban ang halalan habang hindi pa naaprubahan ang bagong SK law.
Nauna ng inihayag ni Marcos na dapat magkaroon ng reporma sa batas para na rin sa kapakanan ng mga kabataan.
Maari naman aniyang makapaghintay ang halalan dahil mas mahalagang mabago ang batas upang mas mapalawak na rin ang “age range” na makakalahok sa mga programa.
Paliwanag ni Marcos na ang SK age range ay kalimitang 15 hanggang 17 kung saan busy ang mga kabataan sa pag-aaral at mga aktibidad sa eskuwelahan.
Sa bersiyon ng Senado nais na gawing 18-24 ang ‘age range’ upang mas magkaroon ang mga kabataan ng “mature perspective” sa kanilang mga responsibilidad.
- Latest