Ex-con tinaniman ng bala sa ulo

MANILA, Philippines - Utas ang isang dating preso na may kasong pagnanakaw matapos itong barilin sa ulo ng hindi pa nakikilalang suspek habang ang una ay nagsusugal, kahapon sa Pasay City. Dead-on-arrival sa San Juan De Dios Hospital ang biktimang si Fernando De Asis, 42, ng Rodriguez St., Malibay, miyembro ng ‘Sputnik Gang’ sanhi ng tinamong tama ng bala  sa ulo buhat sa kalibre .45 baril. Nagsasagawa pa ng follow-up ang Pasay City Police hinggil sa insidente at inaalam pa ang pagkakakilanlan ng suspek.

Sa report na natanggap ni Senior Supot. Florencio Ortilla, hepe ng Pasay City  Police, naganap ang insidente alas-5:00 ng umaga sa panulukan ng Saint Mary at Saint Rosa Sts., Zone 19, Brgy. 178 ng naturang lungsod habang ang biktima ay naglalaro ng cara y cruz nang biglang sumulpot ang suspek na armado ng baril at barilin ito sa ulo.  Samantala, matapos ang ginawang pamamaril ay mabilis na tumakas ang suspek dala ang baril na ginamit  nito. Nabatid na ang biktima ay dating nakulong sa Bureau of Jail Management and Penology (BJMP) Camp Bagong Diwa, Taguig City dahil sa kasong robbery.  Blangko pa ang pulisya sa motibo sa naganap na krimen habang patuloy pa rin ang isinasagawang imbestigasyon.