Estrada pabor sa snap presidential election

Inamin kahapon ni Pangulong Joseph Estrada na pabor siya sa pagdaraos ng snap presidential election sa gitna ng kasalukuyang krisis sa pulitika ng bansa.

Sinabi ng Pangulo sa isang ambush interview na, kung ang snap election ang nais ng nakakarami, mas mainam para ang taumbayan ang humusga sa kanya.

Gayunman, naniniwala ang Pangulo na imposible ang pagdaraos ng snap election dahil hindi ito nakasaad sa Konstitusyon.

Kinumpirma ng deklarasyong ito ng Pangulo ang pagbubunyag kamakailan ni House of Representatives majority leader Eduardo Gullas na nakatimbre kay Estrada ang resolusyong inihain ni Senador Juan Ponce Enrile na humihiling ng pagdaraos ng snap election.

Pero pinabulaanan ng Pangulo na siya ang may panukala ng pagdaraos ng snap election. Iginiit niya na, bagaman pabor siya rito, naniniwala siyang labag ito sa Saligang-Batas.

Nauna rin rito, sinabi ni Executive Secretary Ronaldo Zamora na maaaring maganap ang snap election kung parehong magbibitiw sa tungkulin sina Estrada at Vice President Gloria Macapagal-Arroyo pero ayaw naman itong gawin ng dalawa kaya malabo ang panukala ni Enrile. (Ulat ni Ely Saludar)