Binibining Cebu, pangitaon na
Ang maong indigay gilusad dili pa lang dugay sa buhatan ni Presidential Assistant for the Visayas Michael Dino
Angayan nga mangandam na ang kadaghanan ilabi na ang mga dalagang babaye nga maoy posibleng mahimong pambato sa mga matag munisipyo ug syudad alang sa maong labing una ug gikahinamang indigay.
Gikatakda ang coronation night karong Oktubre 27 sa Pacific Grand Ballroom sa Waterfront Hotel Cebu.
Moabot ngadto sa 54 ka mga kandidata ang gipaabot nga mosalmot sa indigay. Nagikan kini sa 44 ka mga munisipyo, 8 ka siyudad sa Probinsya, ug ang duha ka distrito sa Dakbayan sa Sugbo.
Usa ka disente nga Pinay ang mamahimong mosalmot sa kompetisyon nga maoy mobandera sa ilang lugar.
Kinahanglan nga nagpangidaron kini sa 18-26 anyos nga adunay gitas-on gikan sa 5’5’’ pataas.
Matud pa sa nagmugna og konsepto sa maong indigay nga si Cary Santiago nga kadtong lugar nga maglisod og kuha og pambato, mahimo ra sila-mo-adopt og kandidata.
Malipayon si Santiago nga naghinam-hinam na siya sa maong indigay gumikan kay duna na pu’y laing atngan ang mga Sugbuanon human nawala na ang Miss Cebu.
“Naguol gyud baya ko nga nawala ang Miss Cebu, maong mapasalamaton nga naa ning Bb. Cebu, kay mahilig gyud baya og pageant ang mga Cebuano,” suma pa ni Santiago.
Bukas usab ang maong indigay sa mga tang-an nga duna na’y mga titulo basta nag-representa lang gyud kini sa usa ka lugar sa Sugbo.
Ang labing unang makoronahan nga Binibining Cebu makadawat og ganti nga mobalor ngadto sa P500,000 uban sa gift items nga nagkantidad usab og P500,000 . Ang 1st Runner-Up makadawat og P300,000. Ang 2nd Runner-up makadawat usab og P200,000. Samtang ang 3rd ug 4th Runner-Up makalangkat og P100,000 ug P75,000.
Ang matag munisipyo o syudad dili usab ma-alkansi kun makagasto kini og dako sa pagsuporta sa ilang kandidata gumikan kay aduna usa’y gitagana nga ganti alang niini. Ang dapit kun diin nagikan ang matuboy nga Binibining Cebu makadawat og P200,000 . Ang 1st Runner-Up makakuha kini og P150,000. Sa 2nd Runner-Up, makakuha kini og P100,000. Ang 3rd ug 4th Runner-Up makadawat og P75,000 ug P50,000.
Ang Binibining Cebu aduna na’y mga gihan-ay nga mga kalihukan aron mahimong mabulukon ug sadya ang dagan sa kompetisyon. Gilauman sa mga tagdumala nga mahimo kining hugyaw aron daghan ang mohangop niini.
Mao kini gihan-ay nga mahitabo sa mga mosunod nga mga petsa:
• Festival Costume Competition: Ika-upat nga semana sa Septiyembre.
• Swimsuit Competition: Unang semana sa Oktubre
• Evening Gown: Ikaduhang semana sa Oktubre; ug
• Coronation Night: Oktubre 28, 2017
Gibutyag usab ni Dino nga mosamot og lambo ang Sugbo gumikan kay mahatagan man og higayon nga i-promote ang turismo sa nagkadaiyang dapit sa Sugbo.
“The event will give creative platform for the mayors to showcase every town’s and city’s products and other attributes your locality are known for. So this is not just about beauty and brain, but a springboard to the whole world about your town’s tourism potentials. This creativity is the vehicle to express Cebu’s tradition and culture, and in arts, music and literature”, nagkanayon si Dino.
Gipanglantawan na usab ni Dino nga engrande ang kompetisyon nga ipahigayon gumikan kay ang banggiitan ug nabantog nga si Santiago ang mamahimong pageant crown designer. Si Kenneth Cobonpue usab ang mamahimong pageant seat designer.
Dugang pa ni Dino nga ang pribadong sektor nga panguluhan sa Sacred Heart School-Boys Batch 85 ang mogasto sa maong indigay. Si Miss Earth 2008 Karla Henry maoy main host sa maong indigay. (BANAT NEWS)
- Latest
