Aljay nataypan; Jaymar ug Kate nanamilit

CEBU, Philippines — Nagsagol ang emosyon sa pagdawat ni Aljay Camingao sa iyang ganti isip Star Of The Night sa Cebuano Night nga gikan pa gitunol sa unom ka mga nahimong Sinulog Idols nga sila si Jacqueline Chang (2010), Raechelle Faelnar (2011), Ronna Jenn Lofranco-Cañete (2012), KC Dilao (2015) Jared Roble (2016) ug Aian Uba (2017).

Wala damha ni Aljay nga siya mismo ang mosidlak niadtong gabhiuna gumikan kay nakita niya nga dako og puruhan nga malangkat ni ang ganti sa iyang kauban sa Top 3 nga sila si Angel Maranan ug Arnold Badana

“Lig-on sab gyud silang duha. Maingon nako nga dako sila og chance gyud nga mopadayon sa Top 6 kay grabe sila on stage. But thankful ko bisan og kulba kaayo ko every night, nahatagan nako og justice ug komportable kaayo ko sa akong gikanta. Usa ni sa akong paborito nga kanta ug gipahinungod gyud nako ni sa akong mga pinalangga sa kinabuhi ilabi na ang akong pamilya nga akong gisaaran nga kab-uton nako ang akong pangandoy”, padayag pa ni Aljay.

Natural ra usab nga giawit ni Aljay ang Pangandoy nga unang giawit ni Daryl Leong kaniadto.

Suma pa ni Coach Jay nga nakita gyud niya ang pagka-natural sa pagkanta niini sa maong awit.

Tuod man, napuno usab sa pagpadayag sa gugma ang nahitabong pagpasundayag sa  nahibiling napulo ka finalists nga maoy nagsangka sa ikaupat nga live elimination round sa Sinulog Idol niadtong Lunes sa gabii sa Robinson’s Galleria.

Tagsa-tagsang mipabilib ang finalists sa paghatag og maayong interpretasyon sa ilang napiliang awit.

Ang mga awit nga Uyab Ta Pero Di Ta Magsaba ni Angel Maranan; Balik Na, Pinangga Ko ni Shenahia Postrero; Tim-os Kong Gugma ni Justine Mae Mantua; Usahay ni Rey Ann Kate Ortouste; Ikaduhang Bathala ni Arnold Badana; Kay Unsa Ra Man Ko ni Jeyvee Daño; Panumpa ni Joey Atillo; Binilanggo sa Paghigugma ni Jaymar Ostria; Kinsa Siya ni Claire Yongco mao gyud ang nilanog sa tibuok mall.

Sa naandan matag performance sa mga finalist, modawat gihapon sila sa mga komentaryo ug sugyot nga gikan sa resident judges nga sila si Ultimate Celebrity Coach Jay Unchuan ug Theater actress Apple Abarquez. Niadtong gabhiuna, nihulip una ang Banat News’ Entertainment Correspondent ug Event host nga si James Philipp Lao ngadto sa resident judge nga si Ryan Mark Borinaga.

Sa laing bahin, duha ang nataktak sa maong elimination round ug kini mao sila si Jaymar ug Kate .

Bulahan gyud niadtong gabhiuna si Shenahia gumikan kay nalakip sa Bottom 3 apan nasalbar pa siya og mopadayon pa siya sa sunod nga hugna nga mao ang Rock Night.

“Naguol kaayo ko kay abi nako didto na gyud ko taman. Ganahan na unta kaayo ko mohilak pero pagtingog og balik ni Coach Jay kay mura ko og nabuhi og balik”, suma pa ni Sheena.