Business partners na

CEBU, Philippines — Nagkalig-on karon ang  panaghigalaay nila ni Angelica Panganiban, Sam Milby, ug John Prats tungod kay magkasosyo na sila karon sa ilang bag-ong negosyo nga Bright Bulb Productions. Usa kini ka production house nga maoy mo-produce og music video, film ug uban pa. Ang ilang unang proyekto mao ang music video ni Moira dela Torre nga “Malaya”. Si John ang direktor niini ug si Angelica ang tighimo og konsepto.

Dancing queen

Gipamatud-an ni 1993 Miss Universe Dayanara Torres nga dancing queen pa gihapon siya hangtud karon human siya midaog sa Mira Quien Baila dance contest didto sa Estados Unidos niadtong Martes. Nakadawat si Dayanara og cash prize nga nagkantidad og $50,000. Plano ni Dayanara nga idonar niya ang iyang premyo  ngadto sa San Jorge Children’s Foundation. “It’s an immense joy to bring that check to Puerto Rico. At this time that my country is suffering, this was a moment of joy, a second of hope, that I could bring to my people. I was thinking about them the entire time”, suma pa ni Dayanara.

Surprise party

Nagpasalamat ang Kapuso star  nga si Kristoffer Martin ngadto sa iyang fans gumikan kay nag-effort gyud kini og pahigayon og surprise party sa  set sa  seryeng Super Ma’am. Si Kristoffer nagsaulog niadtong Nobiyembre 20 sa iyang ika-23 nga adlaw'ng natawhan.

Gustong manaygon

Ganahan suwayan ni Darren Espanto ang tradisyunal nga pamaagi sa Pinoy nga pagsaulog sa Pasko. Matud pa ni Darren nga gusto niya nga manaygon sa mga kabalayan tungod kay mao kini ang wala niya masuwayi bisan pa og didto pa siya namuyo sa Canada.  "I think that would be fun. Sana ho hindi po sila mang-snub pag ako po 'yung nag-caroling. Sana po magustuhan po nila”, suma pa ni Darren.

Deadma walking

Motigi na karon si Edgar Allan Guzman ngadto nila ni Vice Ganda, Coco Martin ug Vic Sotto sa Metro Manila Film Festival karong umaabot Disyembre gumikan kay opisyal nga nalakip ang iyang gibidahan nga pelikula nga ‘Deadma Walking’. Matud pa ni EA nga lakip sa maong pelikula ang iyang true-to-life-bestfriend nga si Joross Gamboa.

Gipakpakan

Daghan ang mibilib sa Kapuso aktres nga si Gabbi Garcia human siya ang nahimong host sa segment sa Chika Minute sa 24 Oras niadtong Lunes. Dakong kalipay ang iyang gibati nga nalakip siya sa maong show bisan usa ka gabii lang kini. Pipila sa mga Kapuso star ang mi-congratulate kaniya. Gani, ang Kapamilya aktres nga si Iza Calzado, mibilib ug midayeg usab  kaniya sa iyang appearance sa maong  show.

Nikki nanganak na

Gihimugso na  sa MYX Philippines VJ nga si Nikki Gil ang iyang baby boy nga si Finn niadtong Nobiyembre 20. Si Baby Finn ang bunga sa  panaghigugmaay nila sa iyang  bana nga si BJ Albert.

Gisaulog sa Singapore

Espesyal ang pagsaulog sa ika-41 nga adlaw’ng natawhan sa komedyante nga si Betong Sumaya gumikan kay tua kini gisaulog sa Singapore. Mao sab kini ang unang higayon nga ang iyang makauban sa iyang espesyal nga adlaw mao ang iyang katrabaho sa show nga  ‘Road Trip’.

Favorite place

Nagpahayay ang aktres nga si Bela Padilla sa Siargao. Dinhi nakat-oin si   Bela og  surfing techniques human nagpaubos og surfing lessons atol sa iyang pagbisita  sa maong dapit. Matud pa sa aktres nga giisip na niya kini nga “ favorite place”. (BANAT NEWS)