Maine gihangop
CEBU, Philippines — Si Maine Mendoza maoy usa sa mga artista nga gipakpakan og maayo sa bag-ohay lang nga Bench Fashion Show . Nahugyaw ang audience gumikan sa iyang pag-catwalk. Gipamatud-an ni Maine nga kusog gihapon siya sa masa. Dakong garbo alang kang Maine nga makasalmot sa maong fashion show.
Layo ra
Tsika pa ni Jose Manalo nga layo pa kaayo ang grupo niya nga JoWaPao (Jose, Wally ug Paolo) kumpara ngadto sa dakong naabtan sa TVJ nga sila si Sen. Tito Sotto, Vic Sotto ug Joey de Leon. Matud pa ni Jose nga ilahang giidolo ang TVJ busa dili gyud mahimong ikumpara sila niini.
NagmadaUgon
Ang mga bida sa pelikulang Changing Partners nga sila si Agot Isidro ug Jojit Lorenzo maoy nakalangkat sa top acting awards sa bag-ohay lang nga 2017 Cinema One Originals . Napili ang duha isip best actor ug best actress gumikan sa hugyaw nila nga performance sa maong pelikula.
Kampanya batok bullying
Gitambagan ni Angelika dela Cruz ang mga biktima sa bullying nga motingog gyud og magpatabang sa ubang tawo . Usa ang aktres sa kusog nangampanya batok sa bullying. Makadaghan na nga higayon nga gisuklan ni Angelika ang iyang bashers.
Supportive ra
Gigahinan gyud ni Liza Soberano og oras ang Bench Fashion Show niadtong weekend isip paghatag og suporta sa iyang ka-loveteam nga si Enrique Gil nga usa sa mga nirampa sa maong kalihokan. Todo siyagit gyud si Liza sa dihang nilugwa na si Enrique sa entablado.
Miarang-arang na!
Malipayong gipahibalo ni Lee O'Brian nga niarang-arang na karon ang kondisyon sa komedyanteng aktres nga si Pokwang kinsa nagsabak alang sa labing una nila nga anak. Suma pa ni Lee nga gikinahanglan gyud ni Pokwang ang saktong pahuway. Kapin na sa unom ka buwan nga mabdos si Pokwang.
Online show ni Juday
Malipayon si Judy Ann Santos gumikan sa mga positibo nga feedback nga nadawat sa iyang online cooking show. Napanglantawan ni Juday nga molungtad og dugay ang maong show.
Supportive nga uyab
Dili gyud manghilabot si Mark Herras sa mga schedule sa iyang uyab nga si Winwyn Marquez kinsa busy karong panahona human nilangkat sa titulong Reina Hispanoamericana 2017. Suma pa ni Mark nga supportive siya nga pagkauyab hinungdan nga dili niya gub-on ang mga schedule ni Wiwyn.
Nagsagunson ang projects
Gibutyag ni Paolo Ballesteros karon lang gyud nahitabo nga nagsagunson og taman ang iyang projects. Gawas sa mga T V show nga Eat Bulaga ug The Lolas Beautiful Show, duna pa siya’y tulo ka mga pelikula nga naglangkob sa Barbie D'Wonder Beki, Trip Ubusan: The Lolas Vs. Zombies ug Amnesia Love.
Nag-reunion
Nagkatapok kagahapon sa programang "Magandang Buhay" ang pipila ka miyembro sa Wednesday Group sa programang "That's Entertainment." Nalakip sa maong grupo ang usa sa mga host sa maong show si Karla Estrada ug nibisita niya kagahapon mao sila si April Magalona, Cecile Galvez, Tyrone Sason ug Jojo Abellana . Nitikang usab ang choreographer sa "That's Entertainment" nga si Eugene de los Santos. Nagsaulog si Karla kagahapon sa iyang birthday.
Sarah nakadaog og inernational award
Nakaangkon na pud og laing international award ang singer nga si Sarah Geronimo human sa iyang kadaogan sa Daf BAMA Music Awards dili pa lang dugay. Suma pa sa taho sa Viva nga maoy naghupot sa career ni Sarah, ang singer maoy napili karong tuiga nga best Filipino act sa maong award–giving body.Ang awarding ceremony gipahigayon sa Barclaycard Arenasa Hamburg, Germany sa miaging adlaw. Matud pa sa official website niini, ang Daf BAMA Music Awards , usa kini ka “international multicultural music award” nga gidumala sa Daf Entertainment nga nakabase sa Hamburg, Germany.”Naumol usab kini aron mohatag og pasidungog sa nagkadaiyang artists sa kalibutan. Sa laing bahin, nominado usab si Sarah sa laing international award-giving body nga Golden Panther Awards. Nominado siya sa kategoriyang Best Philippine Artist ug suportahan ang singer pinaagi sa Twitter. (BANAT NEWS)
- Latest