Baron napriso na pud!

CEBU, Philippines — Pipila ka adlaw human nisaad  nga magbag-o na ,    nakasugat na usab karon og laing kagubot ang aktor  nga si Baron Geisler.

Pipila sa iyang fans ang gianugonan kang Baron sanglit bag-ohay lang  gyud  gilibkas ang pagka-ban niya sa Professional Artist Managers, Inc. (PAMI).

Gisikop ang aktor   human matud pa nakamugna og kagubot sa usa ka restobar sa Tomas Morato, Quezon City  niadtong Lunes sa gabii.

Matud pa nga na-ban na diay kaniadto si Baron sa maong establisamento  apan gipasulod na kini og balik niadtong Lunes sanglit nakita sa management nga kalmado na kini.

Sa report sa  ABS-CBN News Online, nagsugod matud pa ang  tensiyon sa dihang nagsugod na kini og maoy.

Samtang sa report usab sa  GMA News Online, naningka matud pa og laing customers ug  staff si Baron ug giingong resulta kini sa iyang giinom.

Napungot matud pa si Baron sa nagpalibot niya nga guwardiya busa nagsugod na kini og yawyaw ug gipangtukmod kini  hinungdan nga nanagan na lang ang ubang customers  ug nanawag dayon og mga polis ang management sa bar.

Giangkon ni Baron nga nakainom siya apan iyang gihimakak nga siya maoy nagpasiugda sa kagubot.

"I was just sitting down quietly just enjoying my drink... yes, para masagot yun, yeah, I had a few drinks.""I was very, very, very quiet.So please, do not speculate, just get the right evidence, is that you need, please.Because this is very uncomfortable, seriously,” saysay pa ni  Baron base sa video post sa ABS-CBN News Online.

Unom ka adlaw Seven Sundays naka-P90M  na!

Nagmaya ang Star Cinema  gumikan sa labing bag-o nga  kalamboan   nga nalangkat sa pelikulang  "Seven Sundays".

Sa unom pa lang ka adlaw nga pagpasalida niini sa mga sinehan, mikita na kini og  kapin sa P90 million.

Kahinumdoman nga nikita kini og P10 million sa unang adlaw nga pagpasalida niini niadtong October 11.

Ang Seven Sundays gibidahan nila ni Ronaldo Valdez, Cristine Reyes, Enrique Gil, Dingdong Dantes, Aga Muhlach ug ubos kini sa direksyon ni  Cathy Garcia-Molina.  (Sanden J. Anadia)

Dream house gisugdan na

Nagmaya og maayo si Julia Barretto gumikan kay gisugdan na sa miaging adlaw ang konstruksyon sa  iyang dream house.  Mapasigarbohong gibutyag ni Julia nga mao kini ang bunga sa hinagoan niya sa showbiz.

Birthday bash sa Barcelona

Gisaulog ni  Bea Alonzo ang iyang birthday didto sa Barcelona sa miaging adlaw.  Nakig-uban kaniya sa maong espesyal nga okasyon ang gidungog niya nga boyfriend nga si  Gerald Anderson.

Modelo ang new inspiration

Usa ka modelo nga nagbase sa America maoy bag-ong  gidiskartehan  ni  Daniel Matsunaga. Ginganlan kini og Karolina Pisarek  ug matud pa giubanan gyud kini ni Daniel sa dihang nisuroy kini sa Palawan. Kauban nila sa Palawan ang ilang mga suod nga higala.

Wala’y pili

Duna’y  mubo nga partisipasyon si Thea Tolentino sa pelikulang This Time I’ll Be Sweeter nga gibidahan nila ni Ken Chan ug Barbie Forteza.  Dili pilian si  Thea og projects, ang labing importante alang kaniya nga duna siya’y trabaho.

Nisuporta sa igsuon

Si Joshua  Garcia  maoy  nagasto sa pagpa-eskwela  sa iyang maguwang nga babaye.  Nitabang usab siya og gasto sa ubang panginahanglonon sa iyang pamilya.   Mao kini ang rason nga nikugi gyud siya og maayo sa mga proyekto nga iyang nadawat sa showbiz.

Lihok ang pasultion

Naghagkanay sila si John Lloyd Cruz ug  Ellen Adarna sa dihang nanambong sila og usa ka espesyal nga kalihokan didto sa Paris.  Gipakita na sa duha ang ilang tinud-anay nga istado  pinaagi sa ilang mga lihok .

Nagkadayon na gyud?

Nitambong si  Meg Imperial sa family gathering  ni  JM de Guzman. Kahinumdoman nga nag-MU (mutual understading)  sila kaniadto.  Duna’y mga obserbasyon nga posibleng mahulma og balik ang ilang love story.

Nauyonan sa amahan

Tsika pa ni  Dennis Padilla nga  wala siya’y pagsupak kang Joshua Garcia kun mao kini mauyab sa iyang anak nga si Julia Barretto. Suma pa ni Dennis nga gipaila-ila na ni Julia si Joshua ngadto kaniya.

Barangay 143

Gipasigarbo ni   John Arcilla ang pagkalakip niya sa Pinoy made anime series nga "Barangay 143" . Kauban niya ang mga banggiitang  artista nga sila si Cherie Gil, Edu Manzano ug  Jaime Fabregas. "Parang anime na first time in the Philippines na tatlo ang producers nya. First time na magkakaroon tayo ng anime na ang istorya ay particularly tungkol sa ating mga Filipino na umiikot sa basketball," suma pa ni John.

Pasok ang  Bomba

Nalakip ang  pelikula ni  Allen Dizon   nga Bomba sa 33rd Warsaw Film Festival nga pagahimoon didto sa  Poland sunod semana.  Ang maong pelikula gi-produce sa ATD Productions ug ubos sa direksyon ni  Ralston Jover. (BANAT NEWS)