Homemade Mojos

CEBU, Philippines — Gawas sa pizza, aduna usa’y laing paborito kitang mga Pinoy nga mao gyud ang atong linyahan sa atong suking mga tindahan nga namaligya og lamian nga mojos.

Karon, angayan na nato nga andamon ang mga sayon nga mga sagul nga mahimo rang mapalit sa inyong suking tindahan gumikan kay ang www.pepper.ph aduna nay gitudlo nga sayon nga proseso aron makahimo ug makakaon og homemade mojos.

Ayaw na paglangay ug sunda na unsaon kini pagbuhat.

Mga Sagol:

4 ka patatas, gihiwa ngadto sa makaupat

2 ka pakete sa all-purpose breading mix

2 ka itlog

1/4 tasa nga tubig

Mantika

Mayonnaise or ranch dressing

Mga gamitunon:

Kutsilyo

Lawom nga panaksan

Tinidor

Kaha

Plato

Ang pamaagi:

Humulan una ang mga patatas.

Samtang naghuwat og pipila ka minutos sa paghumol, batilon ang itlog sa panaksan ug butangan kini og tubig. Ipadaplin inig human og batil.

Hiwaon ang patatas ug ilunod sa gibatil nga itlog nga adunay tubig.

Magpainit sa kaha nga adunay mantika.

Kun wala pa moinit ang kaha, ibubod ang patatas nga gilunod sa itlog didto sa breading mix.

Human og bubod niini, prituhon na kini sa kaha sulod sa 3-4 ka minutos.

Dili kini pasobrahan og luto. Kinahanglan nga brown lang ang texture sa mojos.

Kun mahuman na kini og prito, ibutang na kini sa plato nga adunay kitchen towel aron dili mantikaon inig kaon.

Kun ma-drain na kini, ibutang na kini sa inyong espesyal nga plato aron saw-an sa imong mga kabanay.

Dili mahimong kalimtan ang mayonnaise nga magsilbing sawsawan nga maoy mopalami sa mojos.