“Spa King:” Without God, intelligence is useless

CEBU, Philippines — Nagtubo nga adunahan apan sa kalit lang nausab ang dagan sa ilang kinabuhi human sa kalit lang nibalik sa China ang ilang pure Chinese nga amahan, ug daw sa gikalimtan na sila sa dayon, sanglit wala naman gayud kini nibalik hangtud karon. Apan bisan pa man sa nahitabo, wala siya nagpaapekto niini, hinunua naningkamot aron magmalampuson pinaagi sa iyang paningkamot ug hugot nga pagsalig sa Labaw’ng Makagagahum.

Dinhi mutuyok ang istorya sa kinabuhi sa nailang “Spa King of Cebu” nga si Johnie Lim, ang 60 anyos nga negosyante likod sa karon labihan na ka inila ug malambuon kaayo nga Body & Sole Spa, diin aduna nay mga 70 ka branches nga nahimutang sa nagkadaiyang dapit sa nasud. Duha niining maong mga branches gipanag-iya sa iyang pamilya mismo, samtang franchise ang uban.

Lumad nga taga Tayasan Negros Oriental si Johnie, diin nagnegosyo og kopras ang iyang mga ginikanan. Apan sa linghod nga pangidaron, kalit silang gibiyaan sa iyang amahan, hinungdan nga ang iyang inahan  maoy nipadayon pagdumala sa nahisgutang negosyo. Apan napukan gayud kini ug nabangkaruta.

 “It affected me in a way nga naa koy inner loneliness. I needed him because I was growing that time. Mura ko’g na eldest, I have to decide on things,” paghulagway ni Johnie sa iyang gibati niadtong nahanaw ang iyang amahan. Pito sila ka mga magsuon, siya maoy ikatulo.

Gumikan niini, nilangyaw ang iyang mga igsuong babaye dinhi sa Sugbo aron manarbaho sa negosyo sa paryente sa iyang amahan, sa ingon makatabang sila pagpahuman sa ilang igsuon sa pagtuon. Samtang si Johnie, pagtungtong niya og Grade 5, gibalhin sa public school diin dali siya nga nakauyon ug nitapos sa elementarya isip valedictorian.

Sa high school na, naningkamot gayud ang iyang inahan nga mahibalik siya og tungha sa usa ka private school.  Human sa iyang klase, mutabang gayud si Johnie sa iyang inahan diin siya usahay ang mangalsa ug muhakot og mga kopras. Sanglit kay utokan lagi, nitapos siya isip salutatorian ug maoy nakakuha sa labing taas nga grado sa National College Entrance Examination (NCEE) sa tibuok rehiyon. Nasayran nga 98% ang score ni Johnie.

Gumikan niini, gitanyagan siya og scholarship sa Siliman University, busa nikuha siya og kursong accountancy. Nitrabaho usab siya sa library sa unibersidad diin nagdawatan siya og P300 matag bulan, nga maoy iyang gigamit sa iyang mga galastuhan sa iyang pagtungha. Samtang gikan sa Tayasan, nitipon siya og puyo sa balay sa iyahang uyuan sa Dumaguete, diin maglimpyo siya sa balay ug magtudlo sa iyang mga ig-agaw. Hatagan hinuon siya usahay og kuwarta sa iyang uyuan.

 “Every morning maglampaso gyud ko sa salog ug mag-tutor sa ilahang anak taga-gabii,” hinumdom pa ni Johnie, kinsa mulakaw pa og kapin duha ka kilometro matag adlaw aron makaabot sa tunghaan.

Nausab gayud ang dagan sa iyang kinabuhi, sanglit kon kaniadto aduna sila’y katabang sa balay, nahimo na siyang ingon niini pagtungtong niya og college. Apan padayon gayud ang iyang paningkamot ug pagka mainampuon, dinuyugan usab sa iyang spiritual adviser nga usa ka madre.

Pag-graduate niya niadtong 1980, nanimpad siya dinhi sa Sugbo ug nakatrabaho isip internal auditor sa usa ka shipping company diin gidala siya sa nagkadaiyang dapit sa Pilipinas isip tipik sa iyang trabaho. Nilungtad siya og lima ka tuig sa maong trabaho, una nibalik sa Tayasan. Didto nahimo siyang youth leader ug nisalmot sa mga kalihukan may labot sa pagbatok sa Martial Law.

Dihang nalinaw na ang sitwasyon, gikuyugan ni Johnie sa Manila ang iyang maguwang nga paingong mulangyaw gawas sa nasud. Didto niya nahimamat si Flor, kinsa bestfriend sa iyang igsuon ug karon iyang kapikas sa kinabuhi.

Sa Manila, nahimo siyang accountant sa Sampaguita Pictures sulod sa usa ka tuig. Unya nibalik siya sa Tayasan ug nagbukas og sari-sari store.  Nagkalagyo sila ni Flor, apan damtang og pila ka bulan, nagkasinabot sila nga magminyo. Human sa kasal didto na sila sa Leyte nipuyo kauban ang pamilya ni Flor, diin gihatagan si Johnie og negosyo niini. Apan paglabay sa usa ka tuig, nakahukom siya nga mubalik dinhi sa Sugbo, lakang nga gikasagmuyo sa iyang father-in-law. Apan bug-os na ang hukom  ni Johnie kay tinguha niya nga mubarog sa kaugalingon niyang paningkamot. Ug dihang nakaluag-luag na nisunod kaniya si Flor dinhi sa Sugbo.

Daghan og mga trabaho nga nasudlan si Johnie dinhi sa Sugbo nga puros managerial positions. Nauyonan kaayo siya sa iyang kanhi mga amo gumikan sa iyang ka kugihan. “Kung unsa ang expectations sa work kay ako gyud na i-meet ug usahay mo-exceed pa gani. I give more than what I receive,” paambit pa niya.

Pagkahimugso sa Body& Sole

Dihang nakatrabaho siya sa usa ka Japanese firm diha sa MEPZA, nahatagan siya og oportunidad nga makabakasyon sa Japan. Didto, kanunay siya nga makakuyog sa iyang mga amo aron magpa-spa. “It gives me the idea nga nindot lagi ni siya nga negosyo. Why don’t we bring this to the Philippines?”,  sugilon pa niya.

Panganti ni Johnie nga sa higayon nga aduna na siya’y kaugalingong spa, buot niya nga dili kay ang mga adunahan lang ang makasulod niini. “The vision of our company is to be the number one spa that is offering affordable services to the people. I want the ordinary people to experience nga mag-massage ba--not only rich,” paambit pa ni Johnie.

Human sa iyang naobserbahan didto sa Japan, nagduki-duki na si Johnie kabahin sa spa. Wala nagdugay, niundang siya sa iyang trabaho aron hingpit na nga tukuron ang spa nga nag-aliwaros sa iyang hunahuna. Tuig 2003, dihang nahimugso ang labing unang Body & Sole spa diha sa Raintree Mall nga adunay gidak-on nga 50 square meters. Nipuhunan siya og 250,000, diin ang P100,000 niini, hinuwam niya sa iyang kanhi amo nga Koreano.

Nindot ang dagan sa maong negosyo. Gani, human lang sa lima ka bulan, gipadak-an niya ang iyang spa og dugang 100 square meters. Nitugot na usab sila og franchise gumikan kay nagkadaghan na ang ilang mga kliyente.  Hinumdom pa ni Johnie, nagsugod lang sila og tulo ka services kaniadto ug hangtod nadugangan na kini og face and body scrub, body laser, waxing ug uban pa. Sila mismo maoy mubansay sa ilahang mga empleyado.

 “The success of body and soul is according to God’s grace. Dili kay bright ko or what but because sige lang gyud ko og pray,” niya pa.

Hataas na kaayo ang natungas ni Johnie sa bukid sa kalampusan. Kamatuoran niini, gipasidunggan siya sa Cebu Chamber of Commerce  kaniadto isip “Emerging Entrepreneur of the Year ug gideklara usab nga  “Spa of the Year” ang Body & Sole.

Gumikan niining tanan, wala niya igdawo ang iyang kalampusan.  “Mo-share gyud ko, I have never been proud of my achievements. Kung naa koy matabangan, naa gyud positive nga mahitabo,” butyag pa niya.

Positibo kaayo ang panlantaw sa kinabuhi ni Johnie, diin hingpit na niyang nadawat ang pagbiya sa iyang amahan nga niumol og kahiubos ug kagul-anan diha sa iyang kasingkasing kaniadto.

 “Dili dapat nato i-define atong life sa past nga history. You can change your history; then have faith in God. Without God, intelligence is useless.”

“Faith makes you willing to be patient, willing to work and makes you a nice person,” panapos pa niya. (BANAT NEWS)