Cebu Pop Friday: Kinabuhing Musika ni Iping

Name: NATHAN PHILIPP CABANG AMORES

N-Name: IPING

Age: 36

Date of Birth: OCTOBER 25, 1980

Place of Birth: CEBU CITY

Favorite Singer: ZENAIDA AMORES

Favorite Song: TIDAN-TIDAN

"Sa sinuwatay og kanta, ang akong pilosopiya mao ang "when you are in Rome, never mind the Romans". I am my own critic. Malipayon ko sa akong istilo sa pagsuwat og kanta. Ang dakong hagit mismo sa akong kaugalingon mao ang feeling of contentment o katagbawan. Kinahanglan ko'ng malipay sa akong obra.”

Mao kini ang pagpaambit ni Nathan Philipp Amores o mas naila isip Iping, sa iyang mga kasinatian sa natad sa musika ug sa mga dagkong hagit nga iyang nasugatan sa pagpanimpad niining kalibutana.

Sama sa ubang mga mag-aawit ug tigtagik og awit, nagsugod usab si Iping sa pagdiskubre sa tinaguan niyang talento sa kalibutan sa musika isip choir member sa usa ka simbahan hangtud nga nahimo na siyang miyembro ug frontman sa bandang "The Ambassadors" nga nagsugod niadtong tuig 1997.

Dakong kalipay sa ilang banda sa dihang ang ilang labing unang underground indie full album nga "Chaotic World" maoy napiling album of the year sa Circa 2001.

Sila usab ang nidaug sa "Best Live Performance" sa Studio 23 Mix Banda Rito Competition nga gipahigayon niadtong 2006.

Apan giangkon ni Iping nga dili pulos kaharuhay ang iyang nasinati sa musika. Aduna say mga panahon nga kinahanglan siyang musakripisyo sa pipila ka mga butang.

Sama na lamang sa nahitabo niya kaniadto sa kauluhan kun diin nasinati nila ang labing struggle nga status sa banda nila ug kinahanglan siyang mopili kun ipadayun pa ba niya ang pagsalmot sa maong banda o tapuson na lamang ang iyang pagpanimpad didto .

"That time, I already have kids. Sad but true, pero sa atong music scene, if you don't make it sa mainstream dili gyud maka-buhi og pamilya. And so I decided bisag sakit gamay, niuli ko og Cebu, nibiya ko sa banda ug akoang gitadlas ang lain nga dalan," pagpaambit pa ni Iping.

Sa maong higayon, ang Sugbo na maoy napili niyang lugar isip pahigayunan sa pagpadayun niya sa pagpalambo pa sa iyang dakong paghigugma sa musika.

Tuig 2016 sa dihang nahimo siyang finalist sa tinamod ug nag -unang song writing competition sa Sugbo, ang Cebu Pop Music  Festival.

Nahimo siyang finalist sa gisumite niyang awit nga nag-ulohan og “Kinabuhi Musika” nga gi-interpret ni Ramon Sia Jr. ubos sa inspirational category.

"Akong dakong garbo ug dungog isip usa ka Sugbuanong manuwatay og kanta nga malakip sa Cebu Pop. Nagpasalamat ko og dako niini sa paghatag kanako og luna isip finalist kay bisan paman nga dili ko usa ka nabantog nga manuwatay, gitagaan lang gihapon ko og dakong kahigayunan nga makapaambit sa akong obra." Pagpabuhagay ni Iping sa dako niyang pasalamat sa Cebu Pop.

Gikumpisal ni Iping nga ang iyang asawa, pamilya ug mga nagkadaiyang kasinatian sa iyang kinabuhi maoy gihimo niyang inspirasyon sa tanan niyang gibuhat isip composer.

Dugang pa niya, mas komportable siyang musuwat og kanta kun mag-inusara siya labi na kun naa kaniya ang iyang piano ug gitara.

Gani kasagaran sa iyang mga sinuwat nga awit, siya ra sab ang mokanta niini.

Matud niya, sa mga panahong kaundangun na siya sa pagmugna og mga awit, daw kabliton dayon siya sa ballpen ug papel kansang dugay na niyang giisip nga mga "amigo" ug sa maong paagi, makamugna na siya'g bag-ong awit.

Makanunayong isulod sa alimpatakan ni Iping nga bisan tuod usahay lingawlingaw ra alang kaniya ang pagmugna og awit, kinahanglan mamahimo siyang responsable sa pagtagik niini ug kun mahimo matag panahon ihatag niya ang iyang best sa pagmugna niini sanglit alang niya, ubay-ubay sab ang makapaminaw unya niini ug dili lang kay ang iya rang mama.

Sa katapusang bahin, dako ang pagpasalamat ni Iping ngadto nilang Loi Cinco ug sa Angilicus Choir sa Remedios Parish ug ni Ramon Sia Jr. sanglit mao man kini sila ang naghatag og kinabuhi sa  iyang musika panahon sa pagsalmot niya sa Cebu Pop Music Festival.

Q and A

BNH: Nganong gihigugma nimo ang musika?

IPING: Kay gawas sa Ginoo ug sa akong pamilya, musika ang akong inspirasyon sa pagpakabuhi. Musika ang nagsilbing taming ug ang akong kapahungawan ug dangpanan sa higayon nga maglisod ko og panagang sa kalisdanan.

BNH: Nganong dali raman ka maka-compose og kanta?

IPING: Tungod kay mao kini ang akong hilig ug siguro ingun gyud ana basta mga romantiko.

BNH: Sa tanan nimong gi- compose nga mga kanta, unsay nagmarka gyud nimo?

IPING: "ULIPON SA GUGMANG GIATAY UG FOREVER." Kay gawas nga akong napaambit ang duha ka managlahing dagway sa gugma, "Gugmang Giatay" is a proof ug usa sa mga nagpamatuod nga naa diay ingun ani nga genre. Kay that time, kun dili kataw-anan, kinaraan. Wala'y naa sa tunga-tunga, wala'y nangahas kay dili uso. Somehow nagmarka gyud kini nako kay sa akong gamay nga paagi sa wala nako damha, akong nataghapan og duslit ang karon nga nagdilaab natong gimithi nga banhawon ug ipadayon ang kinaugalingong awit nga  musikang binisaya. (BANAT NEWS)