Liwat ni Angel

CEBU, Philippines - Naliwat matud pa ni Angel Locsin ang anak nila ni Chito Miranda ug Neri Naig. Nangukay pa gyud si Angel og baby photos niya aron pagmatuod nga sama niya og dagway ang bata. Giuyon sab ni Chito ang deklarasyon ni Angel. Suod nga managhigala ang duruha.

Tears and joy house

Gipalanog ni Heart Evangelista pinaagi sa Instagram nga hapit na matud pa mahuman ang iyang gipatukod nga balay. Matud pa niya, matag higayon nga mubisita siya niini, dili malikayan nga makahilak siya sanglit bunga matud pa kini sa iyang kahago sa daghang mga katuigan.

International  star guest

International star matud pa ang sunod nga guest ni Kris Aquino sa second episode sa iyang online show. Suma pa niya, mahimamat niya ang maong guest karong Lunes  kay aduna kini i-present nga konsepto sa usa ka show nga mugnaon alang gyud niya. Kahinumduman nga si Maine Mendoza ang labing unang guest ni Kris sa maong online show, diin nagpasalamat si Maine kang Kris kay kun dili pa matud pa gumikan niini, dili siya musikat karon.

Dili siya

Giangkon ni Janella Salvador sa Tonight With Boy Abunda niadtong Huwebes sa gabii nga siya maoy unang nakahibawo sa panagbuwag nila ni Elmo Magalona ug Janine Gutierrez. Apan gipanghimakak niya nga siya maoy rason sa panagbuwag sa duruha. Suod lamang matud pa sila nga managhigala ni Elmo nga maoy iyang ka-loveteam sa ABS-CBN.

Sorry

Nihilak ang Indie Film Princess nga si Mercedez Cabral gumikan sa bashing nga iyang nahiaguman human sa iyang kontrobersyal post diin iyang giaway si Mother Lily Monteverde. Nangayo siya og pasaylo ilabi na sa iyang pamalikas. Na emosyonal lamang matud pa siya dihang nakabasa sa pamahayag sa Regal Films matriarch kabahin sa indie films.

Mas nindot og lawas

Gihimakak ni Hashtag member Ronnie Alonte nga siya ang lalaki sa gikagubtan karon nga sex video scandal. Komedya ni Ronnie, mas nindot pa siya og lawas sa lalaki nga naa sa video.

Team Philippines

Pasok ang duha ka Team Philippines sa top 3 sa Amazing Race Asia. Kini mao ang team beauty-queens nila ni Maggie Wilson ug Parul Shah ug team fitness sa magtiayong Eric Tai ug Rona Samson. Makatigi nila ang Team Malaysia nga sila si Yvonne ug Chloe.

Duha ka adlaw ra

Duha ka adlaw lang ang magarantiya sa Metro Manila Film Festival executive committee aron masalida ang tanang entries didto sa Manila sugod December 25. Nasayran nga kun human sa duha ka adlaw, hinay gihapon ang pelikula o walay nanan-aw, dili na makapugong ang komite kun ilisdan kini sa tag-iya sa mga sinehan og laing salida nga dili tipik sa festival.

Friends gihapon

Daghang nahimuot nga netizen nga nakakita sa hulagway nga gi-upload ni Rhian Ramos kauban ang iyang ex-boyfriend nga si KC Montero. Nalipay sila kay managhigala diay matud pa ang duruha human sa ilang panagbuwag tulo ka tuig na ang nilabay. Nagkita ang duruha sa usa ka Christmas party para sa usa ka sports channel.

May British guy diay!

Reality show winner ang uyab ni Eat Bulaga host Allan K. apan nagdumili siya pagbutyag sa ngalan niini. Igo lamang miingon si Allan nga mag-pito ka bulan na ang ilang relasyon sa iyang British guy boyfriend. Dili matud pa intense ang ilang relasyon.

#castillonasiabad

Mrs. Castillo na si Kaye Abad human sa ilang mabulokon nga kasal kagahapon diha sa San Pedro Calungsod Chapel sa South Reclamation Project. Nitambong ang pipila nila ka showbiz friends sama nila ni John Prats, Camille Prats, Pooh, ug Jason Abalos.

Kining mga hulagway gikan sa Instagram posts nila ni Thess Gubi, Jason, Camille ingon man sa @makeupbycion ug @kayeinnercircle.

Si Francis Libiran ang nag-design sa wedding gown ni Kaye. (BANAT NEWS)