Angelina nakig-divorce kang Brad
CEBU, Philippines - Human sa 12 ka tuig, hingpit na nga gitak-opan sa Hollywood power couple nga sila si Angelina Jolie ug Brad Pitt ang ilang kaminyoon.
Ang duha nailhan sa kadaghanan isip Brangelina, ug nipasaka na si Angelina og divorce alang kang Brad.
Suma pa sa report sa TMZ, niduso si Angelina og legal documents niadtong Lunes .
Aduna pu’y nanggawas nga tsismis nga matud pa niliko si Brad sa kaminyoon nila ni Angelina, ug giingong miibid-ibid kini sa French actress nga si Marion Cotillard.
Nasayran nga kauban ni Brad si Marion sa upcoming World War II drama nga Allied.
Gikataho nga gipangayo ni Angelina ang physical custody sa ilang unom ka mga anak ug igo ra hatagan visitation rights si Brad.
Ang ilang mga anak naglangkob nila ni Shiloh, 10, ug ang kaluha nga sila si Vivienne ug Knox, 8.
Ilaha usab nga sinagop sila si Maddox, Zahara, ug Pax.
Matud pa sa EW.com, katapusang nasigpatan sila si Brad ug Angelina niadtong July, pipila ka adlaw sa dili pa ang ilang second wedding anniversary.
Nagka-close ang duha sa dihang nagkauban sila sa pelikulang Mr. And Mrs. Smith.
Unang gikasal si Brad ngadto kang Jennifer Aniston apan wala nagdugay ang ilang relasyon, samtang si Angelina gikasal kang Johnny Lee Miller niadtong 1996 apan nisangpot sa divorce niadtong 1999.
Coco giindosar sa kongresista isip arti-drug advocate
Padayon nga nakadawat og mga pagdayeg ang Kapamilya star nga si Coco Martin gumikan sa iyang performance sa primetime series sa ABS-CBN nga "Ang Probinsyano."
Giindorsar ni Surigao del Norte Rep. Ace Barbers ang aktor isip "celebrity anti-drug advocate” ug gibasehan niya niini ang epektibo nga pag-portray ni Coco sa iyang role isip police officer nga si Cardo Dalisay.
Nasayran nga nagkadaiyang istorya ang gipakita sa maong serye ug pipila niini mao ang kontrobersyal nga isyu sa drugas ug korupsyon.
Giduso ni Barbers ang House Resolution No. 358 alang sa paghatag og rekognasyon sa maayong gibuhat sa Ang Probinsyano" .
"The TV series highlights the role of the family and the community, particularly the barangay official in helping law,” tipik sa nalatid sa maong House Resolution.
Mapasalamaton si Coco sa tanang tawo nga nisuporta sa iyang serye.
Parperform ni Shawie sa Bilibid adunay rason
Gitataw ni Senator Francis "Kiko" Pangilinan nga tipik sa TV show sa iyang asawa nga si Sharon Cuneta ang pagkanta niini sulod sa New Bilibid Prison niadtong 2012. Sa programang 'Kasama Mo Kapatid” sa TV5 , gi-feature niadtong higayona ang kinabuhi sa inmates.
Sa katapusang bahin sa taping, nikanta si Sharon og 'Maging Sino Ka Man,' 'Tubig at Langis,' 'Kahit Konting Pagtingin,' ug 'Kahit Maputi Na ang Buhok Ko'.
Matud pa nga nisuporta usab si Sharon sa usa ka outreach program alang sa mga piniriso.
Kahinumdoman nga nahisgotan ang pangalan ni Sharon nga matud pa naka-perform sa NBP. Nitumaw ang iyang pangalan atol sa hearing kalabot sa mga anomaliya sulod sa maong prisohan ug kini suma pa sa testimonya sa inmate nga si Rodolfo Magleo.
Gawas kang Sharon, nahisgutan usab ni Magleo ang pangalan nila ni Freddie Aguilar, Ethel Booba, ug all-female group na Mocha Girls nga gipangulohan ni Mocha Uson. (BANAT NEWS)
- Latest