Pasundayag sa Banauan

CEBU, Philippines - Ang hugyaw nga pasundayag  gikan sa nagkadaiyang sitio sa Barangay Guadalupe, Dakbayan sa Sugbo ug sa mga silingang lugar sa maong dapit maoy matan-awan sa Banauan Festival karong December 10, 2015 diha sa Guadalupe Sports Complex.

Gibutyag sa chairman sa maong kalihukan nga si Cliff Racuya  nga ikaupat na kini ka tuig nga gihimo ang maong kalihukan ug kanunay kini nga hugupan sa mga tawo.

Mihatag og dakong suporta sa  maong kalihukan  ang  kapitan sa maong dapit nga si Michael Gacasan , Konsehal Apol Ross Enriquez ug sa tibuok konseho sa Guadalupe.

 Inig-abot sa December 12 , himoon ang Music Festival sa susama gihapon nga venue kung diin mopasundayag ang Power Trio nga gilangkoban nila ni Stephanie, May Ann Mananquil ug Masumay Booc. Ang maong grupo gihuptan sa  M-Talents Events and Promotions.

Mo-perform usab sa maong kalingawan ang Closet Dolls ug sikat nga grupong Missing Filemon.   Human sa tanang pasundayag, isunod dayon ang foam party nga pagadumalahon sa Powerhouse Events ug usa sa mga sakop niini nga si Kevin Paz.

Ang Pasundayag sa Banauan maoy pipila lang sa kalingawan samtang nagkaduol ang kapistahan sa   Archdiocesan Shrine of Our Lady of Guadalupe.

X Factor Australia Pinoy maoy champion

Ang Fil-Australian nga si Cyrus Villanueva maoy napili nga grand winner sa  X Factor Australia Season 7 .

Nilungtad og duha ka buwan ang maong kompetisyon ug nagmaya og maayo ang mga Pinoy sa naangkon niya nga kadaugan.  Pinoy ang amahan ni Cyrus ug ang iyang inahan maoy taga Australia.

Kahinumduman nga dugong Pinoy usab ang nakadaug sa miaging season sa maong show. Kini mao ang 16 anyos nga singer nga si Marlisa Punzalan,

Gipalukapa sa 19 anyos nga si Cyrus mao sila si Louise Adama nga maoy nahimutang sa ikaduhang puwesto,  samtang sila si Jess ug Matt  maoy nakatungtong sa ikatulong puwesto.

Human gianunsyo ang mga mananaug niadtong Martes sa gabii  nangutana ang  host nga si  Luke Jacobz ngadto kang  Cyrus kung unsa ang  iyang gibati sa iyang kadaugan.

Emosyonal nga nitubag si Cyrus, “I can't thank everyone enough. I want to thank my beautiful family and friends, all the other contestants, the judges, Chris (Isaak), of course. I couldn't have had a better mentor than you.”

Atol sa final round , gikanta ni Cyrus  ang  hugyaw niya nga rendisyon  sa “Wicked Game” kinsa gikanta na niya kaniadto sa nilabay nga episode.

  Pipila sa special guests sa maong programa mao sila si Jason Derulo, Kylie, Dannii ug ang banda nga  Rudimental .  

Angel mouban sa Amerika

 Mobakasyon si Edu Manzano sa Amerika ug makauban niya ang iyang mga anak nga sila si Luis, Enzo ug Adi. Mouban usab kanila ang girlfriend ni Luis nga si Angel Locsin.

Komunikasyon nagpabilin

Gibutyag ni Paulo Avelino nga naa gihapon sila’y komunikasyon sa kanhi niya hinigugma nga si KC Concepcion. Malipayon si Paulo alang KC kinsa gikatahong gipanguyaban karon og foreigner.

Gladys nakahilak

Giangkon ni Gladys Reyes nga nakahilak  gyud siya samtang nag-review sa visual material sa  pelikulang  A Second Chance nga gibidahan nila ni John Lloyd Cruz ug Bea Alonzo. Usa si Gladys sa mga sakop sa board sa Movie and Television Review and Classification Board.

Born To Be A Star

Ang talent search nga  Born To Be A Star maoy usa sa mga programa nga idalit sa TV5 sunod tuig. Gipangandaman pag-ayo sa TV5 uban sa pagtambayayong sa Viva ang  mga umaabot nga programa sa maong network.

Balanse sa oras

Nagtungha karon si Lyca Gairanod sa usa ka international school ug gipaneguro sa batang singer nga dili maapektohan ang iyang pag-eskwela bisan pa man nga busy siya sa iyang singing career. 

Kapatid gihapon

Giklaro ni  Gelli de Belen  magpabilin gihapon siya sa  TV5 bisan pa man nga gihimo siya nga guest dili pa lang dugay sa pipila ka mga programa sa ABS-CBN sama sa Kris TV , Tonight with Boy Abunda ug Kapamilya, Deal or No Deal. Suma pa ni Gelli nga nananghid siya og tarong sa iyang mother network kalabot niini.  Nagkanayon ang actress-TV host nga kontento na siya sa dagan sa iyang career sa TV5.

Inspirasyon ni Andi

Gikatahong non-showbiz guy ang bag-ong inspirasyon  ni Andi Eigennman  apan  dili pa siya andam nga ibutyag ang pangalan niini. Nasayran nga nikatap na ang hulagway nilang duha sa social media.

Bag-ong album

Nahuman na og himo ang bag-ong album ni Sarah Geronimo nga The Great Unknown. Pipila sa mga unod niini ang kantahon niya sa umaabot niya nga concert karong December 4 ug 5 sa Smart Araneta Coliseum.

Hadlok sa kamera

Bisan pa man nga aktibo ang amahan ni Alden Richards nga si Richard Faulkerson  sa pakighagwa  sa mga fans sa iyang  anak sa Twitter , maulawon gihapon kini atubangan sa kamera. Maulaw si Mr. Faulkerson nga magpa-interview.  (Sanden J. Anadia)

Imbetasyon ni Kris gidedma

Wala makauyon si Kris Aquino kang James Yap gumikan kay wala gyud kini nag-effort sa  pagpakita sa ilang anak nga si James “Bimby” Yap Jr.

Sa iyang Instagram post niadtong  Martes,  nipadayag kini nga iyang giimbitar si James alang sa first communion sa ilang anak nga si Bimby apan gidedma ra ang iyang text message.

“While we were in Hawaii, to be precise 2X on Oct 31, 12 hours apart I sent a text informing Bimb's father about his 1st Holy Communion & extending an invitation. I had gone to Church 2X while on vacation & felt that I should give him the opportunity to be part of this special occasion, primarily because of the 4th Commandment: To honor thy father & mother,” tipik sa post ni Kris. Dili gusto ang TV host nga ipatigbabaw ang iyang garbo busa wala gyud niya gidawo si Bimby ngadto sa amahan niini.

“Sana matauhan siya that he's missing out on being a father to such a good boy,” mensahe pa ni Kris ngadto kang James. 

The Voice-USA Dugang Cebuana pasok sa Top 10

Pormal na nga naporma ang Top 10 sa kasamtangang season sa   “The Voice- USA”  ug usa sa nalakip niini mao ang Filipino-American singer  nga si Amy Vachal kinsa ang inahan niini igsuon ni kanhi governor ug karon Kongresista Gwendolyn Garcia.

Lumad nga taga Dumanjug, Cebu ang inahan ni Amy nga si Dierda Garcia Vachal.

Ang labing ulahi nga natagak sa maong show mao ang sakop sa Team Pharrell nga si Evan McKeel kinsa nikanta og "Let's Stay Together."

Kauban ni   Vachal sa Top 10 mao sila si Braiden Sunshine, Zach Seabaugh, Jordan Smith, Madi Davis, Emily Ann Roberts, Jeffery Austin, Barrett Baber ug  Shelby Brown.

Kahinumduman nga nahugyaw ang kadaghanan sa labing ulahi nga performance ni Vachal sa dihang giawit niya ang “Blank Space” ni Taylor Swift diin nidalit siya og linahi nga version niini.

Magtigi na sunod semana  ang mga nasulod sa Top 10 alang sa laing  hugna sa pagkanta.

Maine mosulod sa Princess In The Palace

Molugwa si Maine Mendoza isip special guest sa seryeng Princess In The Palace nga gibidahan ni  Ryzza Mae Dizon.   Si  Maine maoy modala isip  Chef Elize nga mahimong higala ni  Ryzza.

Sa pagawas  niining balitaa, nagpista ang  iyang fans sa Twitter ug nipadayag sa ilang kahinam nga makakita kang Maine sa maong programa  gumikan kay mao kini ang labing una nga higayon nga molugwa ang ilang idolo sa usa ka teleserye.

Gipanglantawan nga mosaka og samot ang popularidad sa Princess In The Palace sa higayon nga mosulod na si Maine. 

Oh lala Jessy!

Ang Kapamilya actress nga si Jessy Mendiola maoy Tanduay Calendar Girl 2016   ug nagbaha na ang hulagway niya sa social media sukad kini  gipahibalo sa miaging adlaw. Mao kini ang labing una nga higayon nga nisugot ang aktres nga mo-todo sa sexy pictorial.   Sa tuig 2015, si Jennylyn Mercado maoy calendar girl sa maong ilimnon.