Pinay group nakapuntos sa UK

CEBU, Philippines – Nahugyaw ang mga hurado sa X Factor UK sa performance sa Pinoy girl group nga 4th Power kinsa ni-audition sa maong show dili pa lang dugay.

Nakadawat kini og daghang pagdayeg og standing ovation gikan sa mga hurado nga gilangkoban nila ni Simon Cowell, Cheryl Fernandez-Versini , Rita Ora, ug  Nick Grimshaw.

Ang mga sakop sa 4th Power mao sila si  Mylene, Irene, Celina ug Almira Cercado .

Sa ilang pag-audition ilang gikanta ang “Bang Bang” nga gipasikat nila ni Jessie J, Ariana Grande, ug  Nicki Minaj.

Unang nihatag og komento ang hurado nga si Cheryl nga nilenggua og, “Girls, you just absolutely took Wembley’s roof off!” You know what’s funny? You came on, you’re so demure. The music kicks in, you all turn into little bad girls up there and it blew my mind.”

Sa interview nila sa maong  programa, gipadayag sa upat nga  aktibo na sila sa pagsalmot og singing competition sugod niadtong  2001.

Aduna na’y  nalangkat nga mga medalya ang 4th Power, diin nanghakot kini og mga gold medal sa  World Championships of Performing Arts niadtong  2006 alang sa  Junior division ug  2013 alang sa  Senior division.

Nailhan sila sa kadaghanan isip  “The Gollayan Sisters” human napili nga  grand champion sa It’s Showtime niadtong  2012.Nakasalmot na usab ang 4th Power  og  Korean talent search nga Superstar K6 sa miaging tuig.

“Manager” ni Coco Martin bastos? Punta Princesa official nasagmuyo

Gilabhan pag-ayo sa konsehal sa Barangay Punta Princesa sa dakbayan sa Sugbo nga si Grace Baquero ang tagdumala kang Coco Martin gumikan sa ka istrikto niini nga wala sa lugar.

Nitikang dili pa lang dugay ang aktor sa maong dapit alang sa promosyo sa iyang bag-ong serye sa ABS-CBN nga Ang Probinsyano.

Sa usa ka facebook post niadtong Sabado, gipadayag ni Baquero ang ilang kasagmuyo sa grupo ni Coco gumikan kay nainsulto sila sa lenggua sa usa ka handler sa aktor nga nga matud pa nagkanayon: ”Lahat paakyatin, walang matitira sa baba. Kahit mga opisyales wala kaming pakialam.”

Matud pa nga gipahawanan gyud ang agianan sa gym sa ilang lugar.

“Sa tanang artista nangagi sa amung barangay, ilabi na sa amung inampingan nga gym, kani ra sila Coco Martin, ilabi na iyang manager ang grabe ka strikto. Pwera gaba! Gipa clear ang agianan para makaagi si Coco, “tipik sa post ni Baquero.

Wala mahimuot ang maong konsehal sa gibuhat sa grupo ni Coco nga buot huna-hunaon, mga opisyales maoy ni-approve aron makagamit sila sa gym.

“Wow, maikog kos ka gwapa sa manager nimo Coco! Way ni bisan kinsa ang pwede makabastos namo sa amung teritoryo,” dugang pa niya.

Mibahad si Baquero nga dili na sila mosugot nga duna’y makatikang nga artista sa ilang gym kung susama gihapon nga management ang magdala niini.

“Ni welcome mi og tarung, kami pay giinsulto. Ka lami i-ban,” suma pa sa konsehal.

Matud pa niya,ala una sa hapon sila gipatapok, niabot si Coco og alas singko sa hapon ug nidalit ra kini og duha ka kanta.

“Pwera gaba. Mag usab pay layog, kung same management ang magdala, dili na gyud mi manugot. Amung mga tao, tanod, pulis, all out ang suporta tawn. Sagdi lang kay natagam nata. Di na sila kausab. Bawal ang mga hilas sa amung barangay. Ayaw namo’g balik,” panapos pa ni Baquero.

Ella mamaligya gigahpo’g banana cue!

Ang 11 anyos nga banana cue vendor nga si  Elha Nympha maoy kampeyon sa ikaduhang season sa The Voice Kids”.  Giawit niya ang “Ikaw ang Lahat Sa Akin” ni Martin Nieverra.

“Nung nag-perform po ako ng ‘Ikaw ang Lahat sa Akin,’ kinakabahan po ako kasi po siyempre performance po iyon. Mas lalo pa po akong kinabahan sa announcement kasi hindi ko pa po alam kung sino ang mananalo. Pero sobrang saya ko na po nung nanalo ako,”matud pa niya.

Si Bamboo Mañalac, maoy coach ni Elha ug mao kini ang unang higayon nga gikan sa Team Kawayan ang nahimong champion sa maong show busa nakahilak gyud ang singer sa resulta.

Gipildi ni Elha sila si  Reynan Dal-Anay, Esang de Torres ug  Sassa Dagdag.

“Hindi ko po ini-expect na mananalo po ako sa ‘The Voice Kids’ kaya sobrang saya ko po. Nagpapasalamat po ako sa lahat ng bumoto sa akin, lalo na po sa taga-Bulacan, sa Kamuning, sa lahat ng kababayan ko diyan. Thank you po sa pagboto sa pag-support sa akin,” suma pa ni Elha.

Walay plano si Elha nga muhunong sa pagpamaligya og saging bisan pa man sa iyang kadaugan sa  “The Voice Kids”  busa target niya nga makatukod og restaurant nga duna’y baligya nga banana cue.

Ang iyang premyo naglangkob sa  P1 million nga  cash,  P1-million trust fund, exclusive recording contract sa  MCA Music, sakyanan, balay ug yuta.