Yasmien gitungo

CEBU, Philippines – Nakugang pag-ayo si Yasmien Kurdi sa tsismis nga matud pa namatay siya. Mikatap ang maong taho sa social media sa miaging adlaw. Giawhag sa aktres ang publiko nga dili dayon mutuo sa mga istorya.

Wala mosaler

Gibutyag ni Sofia Andres nga nakahukom sila si Iñigo Pascual nga hunungon  nila ang panaghigugmaay nila sa usa’g-usa sa wala’y klaro nga rason. Kahinumduman nga “mutual understanding” ang istado nila kaniadto sa dihang nag-uban sila sa pelikulang  Relaks It’s Just Pag-ibig.

Arang-arang ang kahimtang

Nagmaya pag-ayo ang magtiayong Christopher de Leon ug Sandy Andolong gumikan kay miarang-arang na ang pamati sa ilang masakiton nga anak. Sa laing nasud nagpaalim sa sakit nga cancer ang anak nila nga si Miguel.

Raket nasuhong

Nasagmuyo og maayo si Aljur Abrenica sa dihang nakanselar ang Valentine’s concert ni Ai Ai delas Alas. Usa siya sa special guest sa maong concert busa gianugonan siya sa maong raket.

Devon gimingaw ni James

Ganahan si Devon Seron nga makatrabaho og balik ang iyang ka- loveteam nga si  James Reid . Okay lang kang Devon nga makadawat og supporting role sa tandem nila ni James ug Nadine Lustre. Giangkon ni Devon nga gimingaw na siya sa tandem nila ni James kaniadto.  (Sanden J. Anadia)

Piolo ug KC nagtagad

Gibutyag ni Piolo Pascual nga nagtagad sila sa iyang ex-girlfriend nga si KC Concepcion sa dihang ni-guest ang naulahi sa “ASAP” dili pa lang dugay. “I greeted her. Wala namang problema… We are more than civil. Okay naman. We are casual,” suma pa sa aktor.

English Only ipasalida sa US

Giatngan sa mga Pinoy sa Amerika ang pelikula nila ni Derek Ramsay ug Jennylyn Mercado nga English Only Please. Nasayran nga ipasalida sa kapin sa 20 ka mga sinehan sa pipila ka dapit sa Amerika ang maong pelikula.

Mariano dili mobiya pagka-polis

Gipasalig ni PO2 Mariano Flormata, Jr. o mas naila isip Neil Perez,  nga dili gyud niya biyaan ang iyang pagka polis bisan pa man og siya na karon ang Mister International. Suma pa ni Mariano nga tumanon gyud niya ang iyang gisaad nga moalagad sa katawhan.

Pangandoy ni Arjo

Matuman na gyud ang pangandoy ni Arjo Atayde nga makauban sa trabaho ang banggiitang aktor nga si Joel Torre. Malakip sila si Arjo ug Joel sa seryeng On The Wings of Love sa ABS-CBN nga pagabidahan nila ni James Reid ug Nadine Lustre.

Funny Juan

Si Bayani Agbayani maoy co-host ni Jayson Gainza sa umaabot nga reality show nga Funny Juan sa ABS-CBN. Tumong sa maong programa ang pagkaplag og mga komedyante.

Anne mitungtong sa 30

Gisaulog kagahapon ni Anne Curtis ang iyang 30th birthday ug mapasalamaton siya gumikan kay layo na og naabtan ang iyang career busa iyang gihangop ang pagsaka sa iyang edad sanglit normal ra man kini.

Rebelasyon ni Alma

Ni-post si Alma Concepcion og mensahe sa social networking site nga  Facebook kalabot sa iyang kasagmuyo kang Dody Puno, ang amahan sa iyang anak nga lalaki . Suma pa ni Alma nga pito na ka buwan nga nibaliwala si Dody sa mga responsibilidad niini sa ilang anak. Kapila na siya nanawag niini apan dili siya tubagon.

P100M

Mikita na sa kapin sa P100 million ang pelikula nila ni Angelica Panganiban ug JM de Guzman nga That Thing Called Tadhana sulod sa duha ka semana nga pagpasalida niini sa mga sinehan. (Sanden J. Anadia)

Lady Gaga ug Taylor Kinney engaged na!

Nakahukom na nga magminyo ang sikat nga pop star nga si Lady Gaga ug ang  Hollywood actor  nga si Taylor Kinney.

Gipahibalo ni Lady Gaga nga ni-propose si Taylor kaniya niadtong Valentine’s Day.

“He gave me his heart on Valentine’s Day, and I said YES!”, ang caption nga gisuwat ni Lady Gaga sa hulagway nga iyang gi-post sa Instagram kung diin gisul-ob niya ang ilang engagement ring.

Tuig 2011 sa dihang nagkaila sila si  Lady Gaga ug Taylor  ug naghinam-hinam na sila pagpili sa petsa sa ilang kasal.

Pelikula alang sa fallen 44

Mogama og pelikula si kanhi  Laguna Governor ER Ejercito nga mosaysay sa kaagi sa  44  ka mga sakop sa Philippine National Police Special Action Force nga nangamatay sa engkuwentro sa Mamasapano, Maguindanao .

Pinaagi sa iyang Facebook account,  gi-post ni ER ang movie poster  nga dunay tagline nga  Para sa Diyos, Para sa Bayan, Para sa Tao.”

Si Pedring Lopez maoy direktor sa maong proyekto ug gituyo kini aron mapadayag sa bagang duot sa katawhan ang bayanihong buhat sa mga sakop sa SAF.

“Bilang pagpupugay natin sa 44 bayani ng Elite PNP-SAF officers na nagbuwis ng buhay sa Mamasapano clash, isasapelikula ng inyong lingkod ang makulay na buhay at kabayanihan ng ating mga magigiting na sundalo upang mabigyan ng tamang pagkilala at pagpupugay ang #ýFallen44?”, nagkanayon si ER.

Nagkalain-lain ang reaksyon sa  mga netizens sa nahisgutan nga proyekto,adunay mga  nakadayeg niini apan duna pu’y uban  nga nisaway niini ug nagkanayon nga “epal” lang si ER.

Kaniadto ug karon Priscila Raganas walay paglubad!

Si Priscila Mantos Raganas mao’y usa sa mga banggiitang radio talent sa natad sa drama. Lumad nga taga Talisay, City ug inahan sa tulo ka mga anak, nag-edad pa lamang siya og 10 anyos niadtong nagsugod siya sa pangradyo pinaagi sa dyRC.

Pagkakaron aktibo gihapon siyang madungog pinaagi sa dyHP. Ang iyang tingog maoy mulanog luyo sa sikat nga drama sa kabisay-an ug Mindanao, ang Handumanan Sa Usa Ka Awit.

Madungog usab siya sa “Kung Ako Ang Pasultihon” kauban si Teban ug Goliat mata’g buntag, ingon man sa  “Og Mihabu-habo Na” mata’g alas tres sa hapon ug “Bag-ong Bayani” mata’g alas sais sa gabii.

Q & A Banat News Hugyaw:

BNH: Unsa’y nakanindot sa usa ka radio drama talent?

Priscila: Dili kaayo siya lisud nga trabaho gumikan kay tingog ra man nimo ang madunggan isip radio drama talent ug dili makita ang imong nawong. Unya ang nakanindot pud ani kay makahatag ka’g kalingawan sa mga tawo pinaagi sa inyong mga drama nga gidalit kanila. Gawas niana, tungod sa imong tingog ug pangalan nga madunggan sa radyo, hinay-hinay kang mailhan sa mga tawo ug makakita ka’g mga higala. Lingaw ang trabaho sa radyo.

BNH: Unsa pu’y nakalisud aning trabahoa?

Priscila: Ang nakalisud kung mahuman na ang drama series unya dili naka maapil sa casting sa sunod nga series kay lain na man pud na nga casting. Kung wa ka’y apil, wa ka’y buhaton. Mao nang importante nga tarungon nimo ang imong performance aron iapil gihapun ka sa sunod nga drama series. Kinahanglan maayo jud ka mudrama ug mudala sa imong tingog aron mauyonan ka.

BNH: Unsa’y pinaka dili nimo malimtan sa imong pagka dramatorga?

Priscila: Dagha’g mga panghitabo nga dili nako malimtan sa akong pagka dramatorga labi na kung labangon og lawod ang among radio drama. Kadtong mga panahon nga na-stranded mi sa among trabaho gumikan kay naabtan og bagyo, dili jud toh nako malimtan nga panghitabo.

BNH: Unsa’y labing challenging nga role nga imong gidala?

Priscila: Daghan man dili na nako masulti tanan. Ang pinakabag-o mao ang Sultihi ko Eman.

BNH: Unsa’y masulti nimo nga ang mga tawo karun mas hilig na og fm radio?

Priscila: Sa akong nabantayan ang hilig maminaw sa FM mao ang mga batan-on. Okay ra man kay aduna man gihapu’y daghan maminaw sa AM drama labi na kadtong naa sa ilang balay. Malingaw ra man gihapun ang mga tawo maminaw og drama.

BNH: Naabot ba ka sa punto nga gilaay na ka sa imong trabaho?

Priscila: Wala man ko laayi sa akong trabaho kay nalingaw ra man ko. Nindot man pud ni kay makahatag ka’g kalingawan sa mga tawo. Kung ganahan ka sa imong trabaho dili ka laayan.

BNH: Aduna ba’y kalahian ang drama karun ug sa una?

Priscila: Naa’y gamay kalahian ang drama karun ug sa una. Kaniadto sa di pa magsugod ang recording, aduna’y rehearsal. Praktison usa ninyo daan ang script aron diri-diretso na ini’g actual recording. Karon gumikan kay naanad na man mi, mag-iyahay na lang mi og basa sa among mga script.

BNH: Unsa’y rason nga nagdugay ka sa imong trabaho sa radyo?

Priscila: Damgo ug hilig jud nako ang drama mao nga nagdugay ko ani nga trabaho. Nalingaw ra man pud ko ani. Kung ganahan jud ka sa usa ka butang, wala’y rason nganong dili ka magdugay.

BNH: Gawas sa imong trabaho karun, unsa pa’y lain nimo nga gika-busyhan?

Priscila: Wala man koy lain gikabusyhan karon gawas sa mahjong.. hahaha.

BNH: Unsa ka nga klase nga inahan?

Priscila: Makaingon ko nga buotan ko nga klase sa pagka-inahan gumikan kay gipadako nako akong mga anak sa sakto.

BNH: Unsa ang lima ka qualities sa usa ka maayo nga drama direktor?

1. Kinahanglan nga ang usa ka drama direktor kamao ug maayo motudlo unsaon paglitok o pag-deliver sa linya sa iyang mga drama talent.

2. Kinahanglan kamao siya mupili og casts sa usa ka drama series. Kamao mubagay kung unsa nga klase sa character ang iyang ihatag sa iyang drama talent.

3. Kinahanglan on time ka sa schedule sa imong recording. Ikaw baya ang director dapat dili ka maglate-late aron dili musunod ang uban.

4. Kinahanglan kamao ka manghimantay kung sakto ba ang pag deliver sa mga linya. Kamao ka dapat mudala sa recording ug sa imong mga talent.

5. Kinahanglan kamao ka maminaw kung sakto ba ang pagkada sa character o role kung nahatagan ba kini sa sakto nga emosyon.