Nauyonan sa ginikanan

CEBU, Philippines - Nakauyon pag-ayo  ang mga ginikanan ni Enchong Dee ngadto sa modelong uyab sa aktor nga si Samantha Lewis .Suma pa ni Enchong nga nindot ang batasan ni Samantha busa hapsay kaayo ang dagan sa ilang relasyon.

Rayver mapasalamaton ni mother

Gipadalhan ni Rayver Cruz og mga prutas si Mother Lily Monterverde isip iyang pasalamat sa maong movie producer nga gihatagan siya og movie project. Si Rayver maoy bida sa horror movie sa Regal Films nga Dilim kung diin kapares niya si Kylie Padilla.

Panghinaut sa anak

Magsaulog na sa iyang 19 birthday karong November 1 si Andre Paras. Nagmalaumon ang iyang inahan nga si Jackie Foster nga malamdagan na unta ang huna-huna niini. Nasayran nga wala na niya mahimamat ang iyang anak gumikan sa pagbabag sa amahan niini nga si Benjie Paras.

Bag-ong suitor ni Rachelle Ann

Gidungog nga dunay nanguyab kang Rachelle Ann Go didto sa London. Tak-om lang sa maong report ang Miss Saigon star.  Usa kini sa gidudahan kung nganong wala mosaler ang  pagpa-cute ni Slater Young ngadto kang Rachelle Ann.

Sakyanan ang giregalo

Usa ka bag-ong Hyundai Grand Starex Platinum ang birthday gift nila ni Dingdong Dantes ug Marian Rivera  kang  Perry Lansigan. Dako og utang kabubut-on si Dingdong ngadto sa iyang talent manager nga si Perry gumikan kay inatiman gyud niini ang iyang career.

Paolo mikisaw sa Japan

Gi-feature sa usa ka news program sa Japan ang make-up transformation ni Paolo Ballesteros.  Kahinumduman nga nisikat og maayo si Paolo gumikan sa pagsunod niya sa dagway sa nagkadaiyang Hollywood celebrities.

Sandy naayo na

Nakagawas na si Sandy Andolong sa tambalanan human kini nasakit sa miaging semana. Naghinam-hinam na si Sandy sa pagbalik sa iyang trabaho.

Aswang gikataw-an ni Vilma

Gikataw-an lang ni Batangas Governor Vilma Santos ang mga mikatap nga tsismis nga matud pa dunay aswang ang gialagaran niya nga lalawigan. Suma pa ni Ate V nga sa pelikula ra siya nakakita og aswang.

Love scene sa kamaisan

Nagkatawang gitsika ni Michelle Madrigal nga nakabaton siya og garas sa iyang panit sa dihang gibuhat nila ni Arnold Reyes ang love scene nila sa indie film nga Bacao. Suma pa ni Michelle nga gibuhat nila sa kamaisan ang maong eksena.

Polo interesado sa ABS-CBN

Gikumpirmar ni Polo Ravales nga dunay mahitabong panagtigom tali kaniya ug sa ABS-CBN executive sa sunod nga mga adlaw. Giingong interesado ang aktor nga mobalhin sa maong network human sa 19 ka tuig niya nga pag-istar sa GMA-7. Nasayran nga sa miaging tuig pa  napupos ang kontrata ni Polo sa Kapuso Network busa bukas kini nga motrabaho sa laing network.  

Allen gikahinaman ni Diana

Naghinam-hinam na si Diana Zubiri nga makatrabaho si Allen Dizon sa indie film nga Daluyong (Storm Surge). Suma pa ni Diana nga una kini nga higayon nga makauban niya si Allen sa usa ka proyekto.

Morena ang peg

Nakauyon si Kylie Padilla sa iyang hitsura sa Ilustrado gumikan kay gihimo siya nga morena ug dili gyud maklaro ang iyang pagka-mestisa. Gidala ni Kylie ang karakter ni Leonora Rivera nga usa sa nahimong hinigugma niadto ni Dr. Jose Rizal.

Harana sa tambalanan

Si Paulo Avelino maoy nangunay og bantay kang KC Concepcion dihang nalandig sa tambalanan ang aktres gumikan sa dengue sa miaging semana. Giharanahan pa ni Paulo si KC ug siya mismo ang migitara.

Magpakasal sa Paris

Tsika pa ni Solenn Heussaff nga kung makahukom na gani sila nga magpakasal sa iyang uyab nga si Nico Molzico, seguradong buhaton  nila kini didto sa Paris, France aron dili kaayo sila layo sa tagsa-tagsa nila ka pamilya. 

Jaya ganahan mag-author

Nagplano karon si Jaya nga magsuwat og libro nga maghisgot og kinabuhi sa tawo. Layo og naabtan ang singing career ni Jaya busa gusto na pud niya nga masuwayan ang ubang butang.

"True Friends"

Daghan ang nahugyaw niining maong hulagway nga gi-post ni KC Concepcion ug gi-repost ni Marian Rivera sa ilang tagsa-tagsa ka mga IG accounts.

Wala nagdahom ang mga himantayon nga managhigala diay sila si Marian ug KC. Nagpadala og mga buwak si Marian ngadto kang KC gumikan kay na-ospital ang nahisgutan gumikan sa dengue virus, apan wala nay angayang kabalak-an sa iyang sitwasyon karon.

Ang istorya mao nga nagkasuod matud pa sila si Marian ug KC human sila nagkauban isip mga endorser sa usa ka tea brand tulo na ka tuig ang nilabay. Apan matud pa, managlahi nga higayon ang pag-shoot sa maong TV commercial ug sa launching ug promo lamang sila nagkakita, nagkahigala, hinungdan nga nagkasuod hangtud karon.

Kahinumduman nga nagkauban isip brand ambassadors sa usa ka tea sila si KC, Marian, Dingdong Dantes ug Piolo Pascual kaniadto. Niadtong tungora, managhigugmaay pa sila si Piolo ug KC.

Samtang gumikan niini, gihimuan na sab og intriga sa mga tsismosa ang maong hulagway. Matud pa nila, nagpasabot lamang kini nga buotan gyud si Marian sanglit higala niini si KC nga maayo usab og gawi. Dugang pa, ang mga higala matud pa ni Marian kasagaran mga taga ABS-CBN ug mga sikat sama nila ni Angelica Panganiban, Anne Curtis, ug Kathryn Bernardo. Sukwahi matud pa kini sa mga higala ni Heart Evangelista nga sila si Lovi Poe ug Alessandra de Rossi, ingon man si Carla Abellana nga dili matud pa mga sikat. (BANAT NEWS)