Marian minusan ang pagpa-sexy

CEBU, Philippines - Gipahibalo ni Marian Rivera nga minusan na niya ang sexy exposure inigkahuman sa kasal nila ni  Dingdong Dantes . Suma pa ni Marian nga lahi na ang level sa iyang kinabuhi sa higayon nga magminyo na sila ni Dingdong.

Wala masuspenso si Billy

Gipadayag sa tigpamaba sa ABS-CBN nga si Bong Osorio nga dili tinuod ang niulbo nga report nga matud pa gisuspenso si Billy Crawford sa programang It's Showtime. Gipadayag ni Osorio nga igo lang nigahin og oras si  Billy alang sa iyang kaugalingon human kini nag-atubang og dakong isyu sa miaging semana kung diin napriso kini human nanghagis sulod sa prisohan. "Billy is taking a short break from his hosting duty following the incident last weekend," matud pa ni Osorio.

Half Sisters extended

Tapuson na unta ang seryeng  The Half Sisters apan gipa-extend kini sa mga kadagkoan sa GMA-7 gumikan kay ni-click ang tandem nila ni Barbie Forteza ug Andre Paras.  Nanawagan ang fans sa duha nga hatagan og follow-up project ang ilang mga idolo.

Nakabantay sa kiliran

Nalandig si Phil Younghusband sa tambalanan sa miaging adlaw ug ang gidungog niya nga uyab nga si Bangs Garcia maoy kanunay nga nagbantay kaniya.  Wala hinuon gidetalye kung nganong nadala sa tambalanan si Phil kinsa naka-wheelchair karong panahona.

Abroad ang tirada

Mobakasyon si Dingdong Dantes sa Germany ug makauban niya ang iyang mga higalang lalaki.  Samtang sa laing nasud usab ipahigayon ni Marian Rivera ang iyang pagsuroy uban sa higala niya nga mga babaye. Tipik na kini sa mga kalihukan alang sa umaabot nga kasal sa duha.

Pagsure uy!

Nagkatawa si Toni Gonzaga sa mga istorya nga nanggawas nga matud pa mo-propose na si Direk Paul Soriano kaniya atol sa iyang  major concert sunod buwan. "Ayaw na naming makisabay pa," suma pa ni Toni.

Gibuwagan ang girlfriend

Okay lang kang James Reid nga single siya karong panahona aron maka-focus siya sa iyang showbiz career. Suma pa ni James nga siya maoy nakigbuwag sa katapusan niya nga girlfriend nga maisip niya nga "bad breakup" .

Bea mihimakak sa tsismis

Gihimakak ni Bea Binene ang report nga matud pa nga kusog kaayo siya manapat ngadto sa iyang boyfriend nga si Jake Vargas kung mag-away silang duha. Suma pa ni Bea nga kutob ra gyud siya sa yawyaw kung mag-away sila ni Jake.

Uyab ni Iza masinabtanon

Gibutyag ni Iza Calzado nga nakasabot ra ang iyang boyfriend nga si Ben Wintle sa iyang trabaho busa wala gyud kini magselos sa sweet nga mga eksena nila ni Piolo Pascual sa seryeng Hawak Kamay.  Sa wala pa manguyab si Ben kaniya, nasayod na kini sa nature sa iyang trabaho.

Dementia giimbitar sa Portugal

Mapasigarbohong gipadayag ni Nora Aunor nga giimbitar ang pelikula niya nga Dementia nga mosalmot sa  Fantasporto Film Festival didto sa  Portugal.  Ang maong pelikula malantawan na  dinhi sa nasud karong September 24.

Rocco nasakitan

Giangkon ni Rocco Nacino nga nasakitan siya sa dihang gitawag og starlet ni Direk Erik Matti ang iyang uyab nga si Lovi Poe human matud pa midemanda kini og dakong talent fee alang sa pagkalakip unta niini sa pelikulang Aswang Chronicles. Dili na hinuon mohatag og lapad nga komento si Rocco sa maong isyu aron dili na kini modako.

Jodi ug Jolo nag-uli na

Nagtingog na ang mag-uyab nga sila si  Jodi Sta. Maria ug  Cavite Vice-Governor Jolo Revilla. Giingong ginagmay ra ang problema nga nasugatan sa ilang relasyon busa nasulbad ra kini dayon.

Iatbang kang Luis

Mapahiyomong gibutyag ni Direk Mark Reyes nga gi-build up gyud nila og maayo karon si Tom Rodriguez kinsa host sa game show  sa GMA-7 nga  Don't Lose The Money. Matud pa ni Direk Mark nga si Tom maoy pangtigi niya kang Luis Manzano.

Mopuli kang Lovi nakit-an na

Nahuwasan na si  Direk Erik Matti gumikan kay nakakita na siya og babaye nga maoy ihulip kang Lovi Poe  sa sequel sa  Aswang Chronicles. Ang  kanhi  kandidata sa  Binibining Pilipinas nga si  Hanna Mariz de la Guerra maoy mopuli sa role ni Lovi.

Daniel pasok sa Kim-Xian movie

Human sa kadaugan ni Daniel Matsunaga sa  reality show nga  "Pinoy Big Brother: All In", nisamot ang gibating kalipay niini  gumikan kay malakip siya sa  upcoming movie nila ni  Kim Chiu ug  Xian Lim nga Past Tense.

Una na nga gipadayag ni Kim nga si Daniel maoy iyang gisuportahan samtang nagdagan pa sa ere niadto ang PBB All-In. Malakip usab sa maong pelikula ang komedyanteng aktres nga si Ai-Ai delas Alas.