Mapasalamaton sa banat news

CEBU, Philippines - Padayon nga nagsidlak-sidlak ang singing career karon sa Sugbuanon nga si Morissette Amon kinsa nibutyag nga dako ang iyang pasalamat sa mga taga Cebu kay lakip gayud sila sa naghatud kaniya sa istado nga naabtan niya karon.

Usa sa iyang gipasalamatan ang Banat News gumikan kay usa pud kini sa nisuporta kaniya sa dihang nisalmot pa siya sa Star Factor sa TV5 hangtud sa pagkasulod usab niya sa The Voice of the Philippines sa ABS-CBN.

Suma pa ni Morissette nga nahimong tipik ang Banat News sa pagkatkat niya sa hagdanan sa kalampusan.

Bisan pa man nga wala malakip sa final four si Morissette sa The Voice niadto, nakalangkat gihapon siya og atensyon sa publiko ug nahimo gihapon siya nga kabahin sa Sunday musical variety show nga ASAP.

Nakauban na niya kanunay sa trabaho ang mga kaubanan niya niadto sa The Voice nga sila si Mitoy Yonting, Myk Perez, Klarisse de Guzman ug Janice Javier.

Dako kaayo ang gibating kalipay ni Morissette gumikan kay nahatagan gyud siya og kahigayonan nga makatrabaho ang iyang idolo nga si Sarah Geronimo kinsa maoy iyang coach kaniadto.

Dili lalim ang pagsalmot sa The Voice busa mapasigarbohon na kaayo siya nga nasulod siya sa pipila ka rounds niini.

Gipamatud-an ni Morissette sa kadaghanan nga dili gyud basta-basta ang mga Sugbuanon sa natad sa pag-awit.

Matud pa niya nga normal lang sa kompetisyon nga dunay modaug ug mapilde basta ang importante nga gipakita niya ang tanan niya nga "best" aron mahugyaw ang kadaghanan sa iyang performance.

Kasagaran sa mga tawo nisaysay nga unique gyud og tingog si Morissette busa usa kini sa rason nga naka-duet niya si Jessie J sa entablado nga wala damha

Nahugyaw ang international singer nga si Jessie J. ngadto sa Sugbuanon nga singer. Si Morissette maoy nag-interview kang Jessie J alang sa music channel nga MYX.

Nakahisgot si Morissette nga nakanta niya ang usa sa mga awit ni Jessie J sa dihang ni-audition siya niadto sa "The Voice of the Philippines."

Busa ni-request si Jessy J. nga mokanta sa iyang atubangan si Morissette ug nikanta dayon kini og "Who You Are."

Nakauyon si Jessie sa tingog ni Morissette busa gidapit dayon kini nga mag-duet sila sa iyang concert.

Sa mga kalampusan nga naabot karon sa Sugbuanong singer, gipasalig niini nga magpabilin ang maayo niya nga batasan.

Masaligon usab siya nga magpadayon ang Banat News sa pagsuporta sa mga Cebuano kinsa nisulod karon sa showbiz world.

"Happy anniversary Banat News, daghang salamat sa pagsuporta ug pagtabang ninyo nako. More power and may you continue to serve our fellow Cebuanos," saysay pa ni Morisette.

Samtang laing inila nga personalidad sa Sugbo ang nipadayag usab sa iyang pahalipay sa anibersaryo sa Banat News. Kini ang Miss Earth Philippines 2014 nga si Jamie Herrell  kinsa sakop usab sa Wafer Models of the Philippines.

Human nahimong Sinulog Festival Queen 2012 si Jamie, nihatag na og init nga suporta ang Banat News ngadto kaniya, hangtud na nga nisalmot siya sa Reyna ng Aliwan 2013 diin siya nakoronahan.

Giatngan  na pag-ayo  ang padayong pagdepensa sa Cebu sa titulo nga Reyna ng Aliwan sulod na sa pipila ka mga tuig.

Ang maong indigay maoy usa sa mga gikahinaman nga bahin sa   Aliwan Fiesta didto sa Pasay City.

Ang mga representante sa Cebu maoy narayna niini sa makadaghan na nga katuigan, ug si Jamie maoy nagsunod sa kadaugan nila ni Sian Elizabeth Maynard niadtong 2009, Rizzini Alexis Gomez niadtong 2010, Rogelie Catacutan niadtong 2011ug Angeli Dione Gomez niadtong 2012.

Kahibalo siya mosayaw og ballet, jazz, cultural, Hawaiian ug Tahitian. Nakasayaw na usab siya uban sa Sandiego Dance Company niadtong Sinulog 2012. Siya usab ang first runner-up sa Miss Lapu-Lapu niadtong 2012.

"Congratulations and Happy Anniversary Banat News.  May you have more years to come to make Cebu a better place through information, communication, and real life stories that can change people's lives," suma pa ni Jamie.

Samtang ang Sugbuanong  aktres ug kanhi Pinoy Big Brother housemate nga si Dionne Monsanto nipadayag usab sa iyang pasalamat sa Banat News gumikan kay usa kini kanunay nga mohatag og update sa nagkadaiya niya nga projects.

Makita kasagaran si Dionne sa nagkadaiyang serye sa ABS-CBN, ug kasamtangangan siya nga makita karon sa seryeng Pure Love.Gawas sa trabaho niya sa showbiz, nitrabaho usab karon si Dionne sa kongreso.

"Happy 20th anniversary Banat News, may you continue to spread meaningful , relevant news  every single day for another 20 years more , much love and more power," suma pa ni Dionne.