Mommy D trending sa Twitter

CEBU, Philippines - Trending sa Twitter kagahapon ang mga hulagway ni Mommy Dionesia Pacquiao sa dihang niabiba kini pag-ayo sa kadaugan ni Pacman kagahapon kung diin mitungtong gyud kini sa boxing ring. Suma pa ni Mommy D nga wala gyud mausik ang panahon sa pagtikang niya sa Las Vegas.

Kampo ni  Roxanne mipaghot

Ang abogado ni Roxanne Cabañero  nga si Atty. Virgilio Batalla nakaingon nga gusto makaangkon og popularity ang Slimmers World sa pagpangayo og damages niini sa iyang kliyente.  Kahinumduman nga wala mahimuot ang Slimmers World gumikan sa pagsige og hisgot ni Roxanne sa gidumala nila nga Miss Bikini kalabot sa kasong rape nga gipasaka niya kang Vhong Navarro. 

Nagpanon  sa  fight ni  Pacman

Ubay-ubay sa Kapamilya stars ang nisaksi sa boxing fight nila ni Manny Pacquiao ug Timothy Bradley Jr kagahapon sa Las Vegas, Nevada. Kini naglangkob nila ni Sam Milby, Rayver Cruz, Gerald Anderson, Kim Chiu, Xian Lim, Enchong Dee ug Piolo Pascual.

Tradisyon ni  Andrea

Dili mokaon si Andrea Torres og karne karong panahona isip pagtamod sa Semana Santa. Matud pa sa aktres nga mao na kini ang naandan niya matag tuig.

Jen  nalandig  sa hospital

Padayon nga giobserbaran sa mga doktor sa usa ka tambalanan didto sa kaulohan ang aktres nga si Jennylyn Mercado gumikan  kay nagbalik-balik ang iyang hilanat. Sa pagsuwat niining balitaa, wala pa tugti si Jen nga makagawas sa tambalanan.

Vhong  nabalaka

Nabalaka si  Vhong Navarro sa posibleng pagtago-tago nila ni Cedric Lee ug Deniece Cornejo human matud pa aduna kini  tulubagon kaniya. Nasayran nga gikiha sila si Cedric ug Deniece gumikan sa illegal detention nga gibuhat nila ni Vhong.

Isalida sunod buwan

Naghinam-hinam na sila si Carla Abellana, Tom Rodriguez ug JC De Vera sa mahimong resulta sa pelikula nila nga So It’s You sa Regal Entertainment. Karong Mayo 7 na ang play date niini.

Drama  special

Sama sa  Eat Bulaga sa GMA-7, usa ka drama special ang idalit sa noontime show sa ABS-CBN nga It’s Showtime karong semanaha. Giingong masakihan ang paghilak sa TV screen  nila ni Billy Crawford ug Karylle .

Pakpak  Joross

Gipaabot ang hugyaw nga pagdala ni Joross Gamboa isip bayot sa programang Beki Boxer sa TV5 nga gibidahan nila ni Alwyn Uytingco ug Vin Abrenica. Matud pa nga natural kaayo ang pagdala ni Joross sa iyang karakter.

Marian  ulahi nakahibalo

Tsika pa ni  Marian Rivera nga sa media ra siya nakahibalo nga mag-uban diay sila ni Derek Ramsay sa usa ka romantic comedy movie. Matud pa sa aktres nga wala pa siya suginli sa Regal Films kalabot sa maong proyekto.

Bruno target  ni  Lani

Pangandoy ni Lani  Misalucha nga iyang maka-duet sa entablado ang international singer nga si Bruno Mars. Matud pa niya nga makakuha gyud sa iyang atensyon ang hugyaw nga tingog ni Bruno.

Solenn gipauslan

Nagpasalamat si Leo Dominguez gumikan kay gisugtan ra dayon sa GMA-7 ang alaga niya nga si Solenn Heussaff nga maka-guest sa mga programa sa ABS-CBN aron i-promote ang pelikula nila ni Vhong Navarro nga D Possessed. Milugwa si Solenn kagahapon sa  Buzz ng Bayan. Malantawan usab siya sa Aquino and Abunda Tonight, Kris TV ug uban pa.

Jennica  nangita og  kabalhinan

Wala pa kahukom si Jennica Garcia kung unsa nga network ang iyang balhinan. Matud pa sa aktres nga nag-agad ra siya sa maayong proyekto nga itanyag kaniya. Kahinumduman nga wala gi-renew sa GMA-7 ang iyang kontrata. Aduna pu’y sugyot nga nadawat si Jennica nga matud pa mobalhin na lang siya sa TV5 aron makauban niya sa trabaho ang iyang boyfriend nga si Alwyn Uytingco.

Birthday  gift

Usa ka brand new nga sakyanan ang regalo nga nadawat ni Tirso Cruz III atol sa iyang 62nd birthday sa miaging adlaw. Nakugang matud pa si Tirso sa maong birthday gift. (Sanden J. Anadia)

Carla ug Geoff nagbuwag

Gikumpirmar na gyud ni Carla Abellana ang nikatap nga taho nga magbuwag na sila sa iyang longtime boyfriend nga si Geoff Eigenmann.

Sa interview sa  Startalk kagahapon , emosyonal ang  27-anyos apan iyang giklaro nga wala’y third party sa ilang panagbuwag.

Matud pa ni Carla nga wala gyud siya mokuwestyon sa gugma ni Geoff ngadto kaniya apan dili lang gyud sila magkasinabot sa pipila ka mga butang.

Nagkanayon ang aktres nga dili na kinahanglan nga iyaha pa nga idetalye ang rason sa ilang panagbuwag . Giangkon hinuon niya nga dili lalim ang maong sitwasyon ilabi na  nga miabot na sa upat ka tuig ang ilang relasyon ug nasuod na pud niya ang pamilya sa aktor.

Panghinaut ni Carla nga kung makabaton siya og bag-ong uyab, mao na unta kini ang makauban sa tibuok niya nga kinabuhi.

Kahinumduman nga nagkahanap ang relasyon sa duha sa dihang na-link ang pangalan ni Geoff ngadto kang Kylie Padilla. (BANAT NEWS)