Aulga Hardware, 8-0 na

CEBU, Philippines - Segurado na nga maangkon sa Aulga Hardware ang numero unong luna inig human sa elimination round human nila demolisa ang Aname Homes Tungkil, 74-60 sa Guadalupe Golden 50s First Conference basketball tournament niadtong Domingo sa buntag didto sa Guadalupe Sports Complex.

Kini bisan pa og mapilde sila sa nahabilin nilang duwa batok sa Trangia McMill karong Domingo.

Si  Toto Lawas maoy mibida sa kadaugan nga mihakot og 15 puntos, samtang laing tulo niya ka teammates ang miiskor sab og double figures alang sa Aulga Hardware nga aduna na’y 8-0 nga baraha.

Biya og kuwatro puntos sa halftime,  28-32, ang Aulga Hardware kalit nga miratsada sa third period diin ilang na-outscored ang Aname Homes, 24-16 aron mao na’y moabante human sa maong kuwarter, 52-48 ug gikan niadto wala na nila lingia ang Aname Homes.

Si  Capt. Ed Camota maoy topscorer sa Aname Homes pinaagi sa iyang 12 puntos, gisundan ni Edwin Yares nga adunay 11 puntos.

Sa laing aksiyon, ang Pardo Builders miiskor sab og daog dihang ilang gitiwasan ang MCWD Union, 115-87.

Sa first quarter pa lang, gibiyaan na og 25 puntos ang MCWD, 47-22 nga naghawan sa dalan sa Pardo Builders paingon sa kadaugan.

Gipangulohan ni Eric Espinosa ang Pardo Builders nga mikamada og 34 puntos. Nanginit sab si Opong Zafra nga miambit og 24 puntos, samtang sila si Boss Abbu ug Robacs Abella mitampo’g 14 puntos matag usa sa Pardo Builders nga ikatulo sa standing uban ang 6-2  record.

Ang MCWD Union gipangulohan sab ni Arme Marata nga mitali og game-high 35 puntos.  Si Tony Chan mitimang og 18 puntos sa MCWD Union nga nangiwit sa standing sa ilang 0-8 nga baraha.

Sa lain pang duwa, si Dodong Elizalde miposa og 18 puntos aron  mangu sa opensa sa Trangia McMill nga mitumba sa Tejero Archers, 69-60.

Laing nakatampo og daku mao silang Art dela Cruz nga mitimbre og 15 puntos, Boy Comendador nga miambit og 14 puntos ug si Dany dela Peña nga adunay 10 puntos.

Nangu sa Tejero Archers mao si Dede Ferraren nga mipataroy og 28 puntos.

Ang Trangia McMill nagbitbit karon og 5-3 nga baraha, samtang ang Tejero Archers adunay 4-4 record ning maong torneyo nga nahimo pinaagi sa paningkamot nilang Serge Cortes ug Raul Sollano. Ang mga duwa gipadagan ni commissioner Edwin Dejacto Sr.

Puntos matag usa

Unang duwa:

Aulga Hardware (74) – Lawas 15, Bual 13, Galon 13, Miñoza 10, Jacaban 8, Aulga 5, Cabanilla 4, Arias 4, Posadas 2.

Aname Homes (60) –  Camota 12, Yares 11, Rosaroso 10, Jose 8, Padilla 6, Cañete 6, Rivera 5, Alinabon 2.

Ikaduhang duwa:

Pardo Builders (115) – Espinosa 34, Zafra 24, Abbu 14, Abella 14, Solatorio 11, Rosito 8, Castro 8, Villarta 2.

MCWD Union (89) – Marata 35, Chan 18, Pardinian 16, Arroz 10, Cabello 6, Nicanor 4.

Ikatulong duwa:

Trangia/McMill (69) – Elizalde 18, Dela Cruz 15, Comendador 14, Dela Peña 10, Cenabre 3, Ylaya 3, Ancot 2, Fineza 2, Caburnay 2.

Tejero Archers (60) – Ferraren 28, Francisco 10, Ybañez 8, Ocampo 5, Coyoca 4, Tudtud 3, Auditor 2. (BANAT NEWS)