Obligado ba ang asawa paggamit sa apelyido sa bana?

Dear Atty. Divine,

Duna ko’y pangutana may labot sa akong surname. Nagtrabaho ko sa gawas ug next year, nagplano na mi sa akong boyfriend nga magminyo.

Ang akong pangutana kon inigminyo nako next year, kinahanglan ba gyud nako nga usbon dayon ang akong apelyido?

What about ang apelyido nako sa akong passport? Daghang salamat. — Gina

Dear Gina,

Base sa atong provision sa Civil Code, kon ang usa ka babaye magminyo, mahimo siya nga mogamit sa apelyido sa iyang husband or pwede sab siya nga mogamit gihapon sa iyang apelyido sa pagka dalaga.

Buot ipasabot nga option sa babaye kon iya ba nga sundon ang apelyido sa iyang bana, apan dili siya obligado. Sa imo nga kaso, kon magminyo ka next year, naa ra na nimo kon usbon ba dayon nimo ang imong apelyido, or dili.

Samtang kanang imong apelyido sa passport, mahimo man nga huwaton nimo nga mo-expire na ang imong passport og inig-renew nimo niini, imo na nga ipausab ang imong apelyido kon gusto ka nga mosunod sa apelyido sa imong bana.

Mahimo kini pinaagi sa pag-submit  og marriage certificate ngadto sa Department of Foreign Affairs (DFA) inig-renew sa imong passport. Thanks and God bless! —Atty. Divine

* * *

Alang sa inyong pangutana ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.