EDITORYAL - May Koneksyon Ang Palihi Sa Swerte?

Una sa tanan maayo ug mabungahong Bag-ong Tuig kanatong tanan! Ang tuig 2017 usa sa mga puno sa aksiyon nga tuig tungod sa mga hagit ug pagsuway nga naagian. Adunay uban nga milampos ug aduna sa’y uban nga napakyas. Apan importante, bahala og pakyas basta gihimo ang tanan aron kini masulbad, nungka nga wala gyuy, gihimo apan diay to mahimo ra unta.

Karong tuiga, daghan ang mga nagtuo-tuo sa mga Feng Shui nga kon buot huna-hunaon, banyaga sa kulturang Pilipino. Kay lagi aduna may koneksyon ug inpluwensya sa mga Intsik sa mga Pilipino, natakdan na kini sa pipila ka mga naandang tradisyon sa maong mga Intsik. Ang tuig 2018, sumala pa sa mga feng shui experts, mabungahon kaayo nga tuig alang niadtong mga kusog manikay-sikay, apan mao man gihapon kini ang gipamulong nila sa nanglabay nga pagsugat sa Bag-ong Tuig. Balik-balik ra man ni nga panagna.

Hinuon wala may mawala sa tawo kon mosunod niini, o dili. Kay ngano man? Dili man siguro tanang tawo sa kalibutan nga nisunod niini, apan malampuson ug giswerte man gihapon sila sa ilang kinabuhi ug negosyo. Apan adunay uban nga pwerte, mogasto gyud og dako para sa palihi. Kompleto ang 13 ka prutas bisan ang uban putot, hilaw ug aplod pa kaonon, basta lang kuno makompleto ang palihi, apan sa pagtapos sa tuig, wala man gihapo’y niabot nga swerte.

Kay ngano, ang palihi ba diay ang magdala og swerte? Dili ba ang tawo man mismo maoy kinahanglang molihok aron may grasyang moabot sa panimalay? Ang swerte sa tawo magdepende kaniya mismo. Bisan pa og dunay swerte kon ang tawo dili molihok ug mo-grab sa oportunidad, dili gihapon mapunta kaniya ang grasya. Kanus-a pa man intawon swertehon ang tawong tapolan? Busa, kamo diha nga wala pa nakapalit og mga palihi, ayaw kamo kabalaka, kay ang yawe sa kaban sa swerte, anaa kaninyo ug wala sa mga palihi.