Pangandam ni Vinta
Samtang nasentro ang atong atensiyon sa bagyong Urduja nga niungot sa Eastern Samar sud na karon sa upat ka adlaw ug wa pa mopakita og timaan nga nag-apura sa paghunong na pagpabuhagay sa iyang katugnaw ug kabasa sa Sugbo ug kasilinganan nga mga isla nga naapil sa 1,000 ka kilometro nga langyab sa uwan, may lain nga gitutokan si PAGASA Visayas Director Oscar Tabada.
Nabalaka siya sa bagyo nga gitakda nga mosunod pagsud sa nasud. Matud niya ang bagyo nga nganlan og Vinta mas kusog ug mahimo nga moigo sa Sugbo.
* * *
Gisalikway ni Tabada ang iresponsable nga kasayuran nga nikatap sa social media nga mao ni ang super typhoon karong tuiga nga sama kakusog sa bagyong Yolanda niadtong 2013. Apan nitataw sab nga di angay nga kumpiyansahan ang umaabot nga katalagman.
Nitug-an si Tabada sa DYAB Radyo Patrol nga ang bagyong Vinta mahimo nga moigo sa Kabisay-an sa bisperas o sa adlaw gyud sa Pasko. Mao nga karon pa lang gipasabot na ang iyang kaubanan sa PAGASA sa pagkalimot sa bisan unsa nga plano sa pagbakasyon uban sa mga sakop sa ilang pamilya.
* * *
Gipasabot hinuon ni Tabada nga sama ni Urduja, nga nagpatuyang lang og usab-usab sa iyang direksiyon samtang nagkamang sa iyang pag-irog, lisod sab itakda ang tinuod nga agianan ni Vinta.
May gitamdan sila nga models nga nagtakda nga si Vinta mahimo nga mopaibabaw ngadto sa Luzon ug igo lang nga mamidpid sa Kabisay-an. Apan may model sab nga nagpakita nga mosud si Vinta sa Surigao ug moigo sa Sugbo.
* * *
Matud ni Tabada nga inig sud sa PAR bagyo na nga daan si Vinta. Kansang pag-unos gibanabana nga moabot og 160 ka kilometro matag oras, mas kusog sa kinakusgan nga hagiyos ni Urduja nga nalansang sa 90 ka kilometro.
Lain nga gikabalak-an ni Tabada: Ang mga puwersa nga nagbira-bira ug mao ang nakapaungot karon ni Urduja—Amihan ug High Pressure Area—magpadayon pagdominar sa posible nga mga agianan ni Vinta; nagkahulogan nga mahiagom ang Sugbo ug Kabisay-an di lang sa mas kusog nga hangin ni Vinta kon dili sa mas daghan, mas taas og lahutay ug busa mas makadaot niya nga pag-uwan.
* * *
- Latest
