Du30 country g’yud diay ang Sugbo

Dili na mabangbang ang suporta sa Sugbo ug sa mga Sugboanon ngadto kang Presidente Rodrigo Duterte. Gipakita kini niadtong Biyernes diin kapin 50 mil ka tawo ang mipunsisok sa Plaza Independencia aron manumpa sa PDP-Laban.

Adunay nakasulti kanako nga kahilakon nga naglantaw sa bagang duot sa katawhan si presidential assistant for the Visayas Mike Dino. Matud sa atong tinubdan nga wala siya makatuo nga ingon kadaghan ang misanong sa awhag pagsuporta kang Duterte pinaagi sa pag-apil sa partido sa administrasyon.

Sa maong kalihukan nga nasaksihan mismo ni House Speaker Pantaleon Alvarez ang kahiusahan sa mga Sugboanon pagpaluyo sa presidente, sa iyang reporma sa panggobiyerno, ilabi na sa iyang pakiggubat sa drugs ug kurapsiyon.

Kay nag-abot sa maong mass oath-taking ang isig ka habig – ang mga mayor nga sakop sa Liberal Party nga mitapon ug ang mga pilderong sakop sa One Cebu party – nga nagdungan og tapon paingon sa PDP-Laban. Si Dino kanunay’ng masaypan ni Mayor Tomas Osmeña nga modagan pagka-mayor sa siyudad sa Sugbo. Tingali, mao kini hinungdan nganong gisigihan kini og daot sa mayor. Pero ang kalihukan niadtong Biyernes maisip nga pruweba nga dili lang siyudad sa Sugbo ang gihikutar ug gisagubang ni Dino, kay nakapahiusa man siya sa tanang mga politiko sa Sugbo.

Dili na lang gani angayang hisgotan ang Liberal Party. Matud sa akong higalang bugalbugalon, kining maong partido ‘mitaliwan’ na dinhi sa Sugbo niadtong Biyernes. Bugalbugal, pero may punto siya tungod kay si Tomas ug si Gobernador Junjun Davide naman lang nahibilin sa LP.

Si Davide nagkanayon nga andam siyang makig-alayon sa PDP-Laban. Apan alang sa unsa pa?

Makasabot kita nganong dili makatalikod si Davide sa LP. Iyang buotang amahan nga si kanhi Supreme Court Chief Justice Hilario Davide Jr. dako kaayo og utang kabubut-on sa mga Aquino.

Apan kuli nga makaalyansa siya sa PDP-Laban tungod kay dili haum ang iyang mga adbokasiya sa maong partido.

Usa pa, ni-float na usab og balik ang ngalan ni Kongresista Gwen Garcia sa pagka-gobernador sa Sugbo sa eleksiyon unya sa 2019.

Apan dili angay magmaya si Gwen kay sa dihang mipahibalo niadtong miaging semana ang mga mayor nga motapon na sila sa PDP-Laban, mipakapin sila nga adto gihapon sila mosuporta kang Davide sa pagka-gobernador sa 2019.

Angay kining hunahunaon nganong ganahan pa sila ni Davide kay ni Gwen. Sa pamalakad? Sa pag-apud-apod sa mga proyekto? Sa dinad-an sa mga mayor? Mao kini tan-awon pagkomparar nila ni Junjun ug Gwen.

Lain nakong sungogon mao ang Kilusang Pagbabago. Unsa kaha’y plano karon sa maong grupo karon nga nakita nga ang ilang kontra makatigum man og 50 mil ka tawo sa duha lang ka semana nga preparasyon.