Lethal vaccination?
Kini ang pangutana human sa kamatayon sa duha ka masuso didto sa Barangay Pajac, dakbayan sa Lapu-Lapu. Mipasangil ang mga ginikanan nga ang nakaingon sa kamatayon sa ilang mga anak mao ang pagpabakuna nila sa health center sa naasoy’ng barangay.
Dungan kuno nga nabakunahan ang duha ka bata ug pareho sila nga nadala sa tambalanan diin gibawian sila sa kinabuhi. Wala’y sukod sa kasakit ang gibati sa mga ginikanan sa nahitabo sa ilang mga anak.
Tinguha unta nila nga mahalikay sa peligro gikan sa mga balatian ang mga bata hinungdan nga gipabakunahan nila kini apan unsa man nga pagkaunsaa nga namatay man hinoon.
Dili nato sila mabasol kon ang bakuna maoy gituohan nila nga hinungdan.
Apan gikinahanglan nga masuta ug masayran g’yud ang tinuod nga hinungdan sa panghitabo kon ang bakuna ba g’yud ang nakaingon sa kamatayon sa duha.
Kon masuta nga dunay kasaypanan ang mga nag-administer o responsable sa vaccination, angayan silang silotan.
Apan gikinahanglan usab nato nga tan-awon kon wala ba sa’y pagkuwang ang mga ginikanan.
Dunay nag-ingon nga ang usa ka bata, ang iyaan ra maoy nagdala niini ngadto sa health center, ang usa usab ka bata ang apohan ra ang nagpabakuna.
Aduna usa’y nag-ingon nga human gipabakunahan ang usa ka bata gihilantan kini isip normal nga epekto sa bakuna, apan gipainom og paracetamol nga dili unta angay.
Masuta g’yud kining tanan pinaagi sa pakisusi gamit ang scientific process, dili kay ibase lang sa speculation kun pagbana-bana.
Usa na niini ang autopsy, apan mura’g dili man bukas ang mga tagtungod. Huwaton na lang nato ang resulta sa imbestigasyon sa DOH ug unta dili lang kini kutob sa imbestigasyon.
- Latest