Daghang salamat Cardinal Vidal

Karong adlawa, wala’y klase ug wala’y trabaho sa tibuok isla sa Sugbo. Karong adlawa, mao pud ang kataposang adlaw nga atong makita ug makauban ang patay nga lawas sa talahurong arsobispo emeritus sa Sugbo Ricardo Cardinal Vidal, tungod kay karong buntag, ilubong na siya.

Ang paglubong ni Cardinal Vidal tambongan sa kaubanan niyang mga cardinal, obispo ug gatusan ka pari ug madre, ug liboan ka tawo nga gikan sa nagkalainlaing dapit sa nasud.

Sa dili pa ilubong si Cardinal Vidal, ituyok una ang iyang patay’ng lawas sa mga karsada nga nagpalibot sa Cebu Metropolitan Cathedral. Didto sa mausoleum, makauban ni Cardinal Vidal sila si Julio Cardinal Rosales, Msgr. Manuel Salvador ug lain pa’ng upat ka namatay’ng pari.

Dili lang mga pari ug madre ang mohatod karon sa lubong ni Cardinal Vidal, kon dili, apil usab ang mga inila nga tawo sa katilingban. Ingon niini ka mahinungdanon ug ka dako sa atong gugma ni Cardinal Vidal.

Bisan man tuod sa kadaghang hagit nga nasugatan niya sa iyang pagdumala sa simbahang katoliko dinhi sa Sugbo, sama sa mga pari nga nagpabadlong, apan iya g’yud kini nga nabarugan.

Sa iyang kampanya kaniadto sa mga law-ay nga talan-awon sa mga sinehan ug mga balay kahilayan, daw sa gibaliwala lang si Cardinal Vidal sa mga polis ug mga opisyal sa lokal nga kagamhanan, tungod kay igo lang niya sila nga gisultian ug gipahinumdoman sa pagka- daotan niini.

Apan sa dihang iyang gipalihok ang mga organisasyon sa simbahan ug gipabaha ang wala’y hunong ug wala’y puas nga protesta, nahigmata ug nakaamgo ang mga polis ug ang mga politiko.

Namati na sila ni Cardinal Vidal ug hangtud nga gihugtan ang kampanya ug nawagtang ang mga law-ay nga salida sa sinehan ug mga balay kahilayan.

Daghan kaayong salamat Cardinal Vidal sa maayo nimong pagdumala sa atong simbahan, ug pag-ayo-ayo sa imong pagpanaw.