Christmas in September

Pagtungtong gyud sa Septiyembre, unang bulan sa mga “Ber” months, sugod dayon ang pipila ka radio stations pagpatokar og mga alawiton sa Pasko, upat ka bulan una mag-Pasko.

Pastilan, ambot unsay ilang gidalian, hangtud nga inig-abot na gyud sa Pasko, mawad-an na sa tukmang kahulogan, puol na ug wa nay laming paminawon ang maong mga Christmas songs.

Sa among panahon, una namong pagkadungog og Christmas song, sa dayon nang Misa de Gallo, makapahinuklog ug makapamalandong kadto kanamo mahitungod sa kahulogan sa maong mga alawiton sa Pasko ug sa Pasko mismo.

Apan karon, sa ako nang giingon, walay epekto ang mga Christmas songs, tungod kay bakikaw kaayong paminawon nga magsaulog kita sa Pasko in Septiyembre.

* * *

Midason kita sa awhag sa mga Kapitan sa Barangay sa dakbayan sa Talisay nga ang kapolisan mohimo og masubsob nga checkpoints, meaning dili off-and-on, ug regular nga moduaw sa 22 ka barangay sa Talisay.

Police visibility. Usa kini ka dakong deterrent batok sa kriminalidad. Hinoon, lisud kining buhaton, dili lamang sa Talisay City kundili sa tanang dapit sa tibuok nasud, ilabina sa mga dagkong siyudad gumikan sa kakulang sa mga police personnel.

Maoy hinungdan nga aron pag-augment sa gidaghanon sa kapolisan, mga Tanod ilang i-deploy aron pagtabang pag-maintain sa peace and order sa barangay. Arang-arang na lang.

Samtang sa Mandaue City, sa gisugyot nga did-an ang pagsul-ob og bonnet og ubang matang sa gadget nga motabon sa nawong sa mga driver sa motorsiklo ug sa mosakay niini,  adunay mga grupo nga misupak niini for health reasons kuno. 

Main reason ning maong proposed ordinance mao nga gumikan sa pagtabon sa ilang mga nawong, lisud alang sa kapolisan pag-ila sa mga crime perpetrators, hinungdan nga daghan karon ang wala masulbad nga krimen nga gama sa mga nagmotorsiklo. Health hazard kuno kon dili magtabon sa tibuok nawong ang usa ka motorcyclist. Ngano man?

* * *

Iksakto si Presidente Digong Duterte nga dili kabuhatan og balaud ang anti-fake news kay masupak kini sa katungod sa freedom of expression. Bitaw. Besides, unsaon man  pag-determine unsa ang fake news, unsa ang good news? Kon dili ka ganahan sa usa ka news, o kon naigo ka sa balita, fake news na ni?

Unsa man, atong tudloan ang media unsaon paghimo og news aron dili kini ma-fake? Ug kon ang tinubdan sa fake news usa ka dakong opisyal sa kagamhanan, atong prisohon ang nag-report niini?