Dugay na nga panerbisyo

Kinse ka tuig na ang NEWGAD, INC. sa iyang krusada batok sa ilegal nga drugas ug kurapsyon.

Ang NEWGAD nagsugod isip usa ka kahugpongan sa mga tinun-an nga nagkuha sa subject nga Philippine Constitution sa Southwestern University niadtong Septiyembre 21, 2002 ug rehistrado sa Securities and Exchange Commission (SEC) niadtong Septiyembre 3, 2010. Tulo ka gimbuhaton sa NEWGAD mao ang Information dissemination, organizing ug livelihood. Ang una ug ikaduha, nahimo na apan ang ikatulo, wala pa tungod sa kakuwang sa iyang panalapi.

Ang NEWGAD miabot na sa Bohol; sa Dakbayan ug Lalawigan sa Sugbo sa pagsabwag sa kasayuran kabahin sa daotan nga epekto sa gidili nga drugas ug kurapsyon. Maglima ka tuig na usab kini sa iyang programa sa radio, Krusada Batok Drugas ug Kurapsyon nga madunggan sa DySS Super Radyo gikan sa alas 9:00-10:00 sa buntag matag Domingo. Salamat kaayo sa management sa RGMA nga mipagamit sa ilang kahimanan ug personnel nga libre. Ning bag-o, ang NEWGAD ug Jack7 Sportswear nagsugod na usab sa ilang pagtinabangay sa pagpahibalo sa daotan nga epekto sa gidili nga drugas sa mga tunghaan ug mga barangay dinhi sa dakbayan sa Sugbo.

Gisugdan kini niadtong Septiyembre 22 sa SWU-Phinma kauban ang taga PDEA ug mga misyonaryo gikan sa Britanya. Karong Septiyembre 29, moadto na pud kini sa Barangay Quiot aron mapasabot sa mga tinun-an sa Grade 7 ug 8 sa Quiot National High School.

Bisan kulang sa salapi, wala magpaapekto niini ang NEWGAD. Nakahimo gihapon kini sa iyang gimbuhaton tungod sa tabang sa mga tawo ug kompaniya nga iyang gisangpit. Sama ni Noel Villaceran sa Jack7 Sportswear, San Jose Bakeshop pinaagi ni Glenn Toledo, Atty. Manuel Gordon ug Cris Ronquilio sa Globe telecom, Charlie Jo, Congressman Bebot Abellanosa ug mga dili gustong magpaila.

Isip tsirman sa Board sa NEWGAD, INC., magpasalamat ko kaninyong tanan nga misuporta.