EDITORYAL - Mga peke midagsang

Nabalaka kaayo karon ang publiko sa pagtumaw sa daghang peke. Kaniadto, ang kasagarang peke, o dili “orig,” mao ra g’yud ang mga compact disc ug DVDs. Apan karon daghan na kaayong peke gikan sa ‘fake news’ ug apil na ang mga pagkaon. Kinsa man intawon ang dili malisang niini nga hasta ang bugas ug utanon nga mapalit sa kamerkadohan, ilabi na kadtong imported, dili na man diay masaligan kay may mga ginama na sa kemikal. Kon tuohan ang mga nanggawas nga mga videos diha sa mga social media sites, sagad sa mga giingong peke nga produkto, nagagikan g’yud sa nasud sa China.

Maayo kaayong pagkahimo nga dili gyud mabantayan nga ginama diay sa mga kamot sa tawo ug sa makina, ug dili sa natural nga paagi. Usa niini kining fake rice nga nakapabalaka gyud sa mga tawo kay may nangreklamo na man g’yud. Dugangan pa sa pagkatap sa mga balita bahin sa mga pekeng bugas diha sa social media, samot nga nakondisyon ang hunahuna sa mga tawo, mao nga gamay lang gani nga kausaban sa lami o grano sa naandan nilang bugas kaniadto, magduda na dayon sila nga peke ang bugas.

Mas maayo tingali nga moaksyon na ang mga hingtungdang ahensiya sa gobiyerno bahin niini, sama sa International Rice Research Institute, Bureau of Food and Drugs, Department of Agriculture, Department of Health, Department of Science and Technology, ug uban pa. Samtang tuod kinahanglan pa nga ipa laboratoryo kining mga gidudahan nga pekeng bugas, dili mapugngan sa gobiyerno ang mga tawo nga mahadlok na pagpalit og bugas.

Angay nga mohimo g’yud dayon og mga lakang aron pangitaon kon kinsa ang nagpalusot sa mga peke nga bugas ug uban pa nga pagkaon, ug pamatud-an ang mga pagduda kay hulga kini sa panglawas sa katawhan ug kaugmaon sa nasud.