Sugo sa demonyo

Ang pagtinabangay sa katawhan maoy labing lig-on nga yawe nga kapanalipdan nato ang atong katilingban gikan sa mga dautang elemento nga gustong mosabwag og kasamok.

Ang nahitabong kagubot sa Marawi City, posible usab nga mahitabo sa uban nga mga dapit sa nasud kun dili mapuo sa mga tropa sa kagamhanan ang mga terorista.

Ang Dakbayan sa Sugbo, andam kuno nga mosagop sa mga refugees gikan sa Mindanao basta maseguro lang nga dili kini mga dautang tawo.

Usa kini sa gituki atol sa tigom ni Mayor Tomas Osmeña uban sa mga miyembro sa Muslim community niadtong nakalabay nga semana.

Maayo man nga lakang ang pagpakig-alayon sa Muslim community aron mabantayan kadtong mga tawo nga mosulod dinhi nga posibleng adunay dautang katuyoan sa atong dapit.

Apan mas maayo nga dili lang ang Muslim community ang tigumon, kun dili, maayong apilon ang tanan, Kristiyano, Hindu ug ubang sakop sa mga relehiyon aron segurado gyud nga dili malutsan sa mga terorista.

Ang Dakbayan sa Lapu-Lapu, gitigom na ni Mayor Paz Radaza ang tanang opisyal sa mga barangay alang sa pagpahugot pa sa barangay intelligence batok sa mga dautang elemento.

Mas maayong himoon gani sa mga barangay kapitan nga mopatawag og barangay assembly, aron itisok sa alimpatakan sa katawhan kun unsa ka grabe ang problema sa terorismo nga atong giatubang.

Ang kamatuoran mao nga nakaabot na sa atong nasud ang gaway sa labing salbahis nga Islamic State of Iraq and Syria (ISIS), ang mga sugo sa demonyo maoy ilang himoon.

Kini atong maalkontrahan pinaagi sa pag-igmat ug labaw sa tanan hugot nga pag-ampo.