Authoritarianism!

Kun ang Philippine National Police ang pasultihon, wala’y ISIS (Islamic State of Iraq and Syria) sa Mindanao, kun dili, mga local terorist nga Maute Group lang ang naglihok didto nga maoy nagsabwag og kasamok, ilabi na sa Marawi City.

Gusto lang kuno sa mga sakop sa Maute Group nga makakuha og pagtagad sa international terrorist group nga ISIS. Mosukwahi kini sa pamahayag ni Presidente Duterte nga nakasulod na ang maong teroristang grupo sa nasud mao nga nideklarar siya og martial law sa tibuok Mindanao.

Matud sa presidente nga dili siya magpanuko sa pagpaubos sa tibuok nasud sa balaod militar sa higayon nga makasulod sa Visayas ug Luzon ang ISIS. Kun atong sabton ang pamahayag sa presidente, anaa na sa Mindanao ang ISIS. Sa pikas bahin, niinsister ang Armed Forces of the Philippines nga dili palpak ang ilang intelligence.

Pastilan klaro pa sa siga sa adlaw ang ilang lapses tungod kay wala nila mabantayi ang mga terorista nga mao na’y nag-takeover sa mga checkpoints sa Marawi City. Nahitabo kini atol sa pag-serve unta og warrant batok sa lider sa mga terorista nga si Esnilon Hapilon, kinsa lider usab sa Abu Sayyaf.

Ang militar ug kapolisan nasayod na daan unsa ka delikado ang sitwasyon, apan kumpiyansa kaayo sila. Kini ba ang gitawag nila nga wala’y sipyat sa ilang intelligence?

Sa pagdeklarar sa presidente sa martial law sa tibuok Mindanao, adunay mitumaw nga katahap kun unsa gyud ang motibo niini, sanglit sa Marawi ra man nahitabo ang kasamok?

Dili ba kaha usa lang kini ka pag-testing sa Duterte administration sa pulso sa mga Filipino kun dawaton ba pagbalik ang sistema sa martial law nga gipatuman kaniadto sa kanhi diktador nga si Marcos? Hatagan nato og kahigayonan ang 60 ka adlaw nga tagal sa presidente sa balaod militar didto sa Mindanao aron masumpo ang mga terorista.

Apan gikinahanglan kita nga magbantay kun unsa ang mosunod nga panghitabo kay basin mahigmata na lang kita nga naa na kitang tanan sa landong sa makihari-harion, kon awtoritaryanismo nga panggobiyerno.