Duka nga NBA playoffs
Manghuy-ab na ba lang ta sa pag-agwanta sa nahibiling mga duwa sa conference finals sa NBA sa dili pa ang gikahinaman nga panagsangka sa ikatulong sunudsunod nga tuig sa Cleveland Cavaliers, ang defending champions, ug Golden State Warriors, ang kampeyon sa 2015?
Mahimo nga wa ta’y kapilian tungod sa pagkaangol ni Kawhi Leonard, nga gikabalak-ang makapa-inutil sa beteranong San Antonio Spurs atubangan sa kakiat sa opensa sa Warriors, ug sa bag-o lang nabisto nga pagkaangol ni Isaiah Thomas, nga gikahadlokan nga makapasamot kaapiki sa Boston Celtics batok ni LeBron James ug sa Cavaliers.
* * *
Human sa pagblangko sa Warriors ug Cavaliers sa Spurs, ug Celtics sa unang duha ka duwa sa NBA semi-finals, giisa na ang kahigayonan nga moabante ang duha ka dominanteng teams sa NBA Finals nga pulos magdala sa rekord nga 12-0, nga wa pa sukad mahitabo sa kasaysayan sa NBA.
Bisan sa ka-dominante sa pipila sa nangaging mga kampeyon, wa pa masaksihi nga ang mga kampeyon sa Eastern ug Western conferences mag-abot nga wa’y bisan usa ka pilde sa ilang naagian nga tulo ka hugna sa best of seven nga series sa playoffs.
* * *
Diha nga nanghawod sa Dekada 80 sila si Larry Bird sa Boston Celtics ug Magic Johnson sa Los Angeles Lakers, labihan kalig-on sa uban nilang mga kaatbang nga wa gyud sila magkaabot og tulo ka sunudsunod nga finals.
Diha nga nanghawod sa Dekada 90 sila si Michael Jordan ug ang Chicago Bulls, managlahi ang ilang mga kaatbang (Lakers sa 1991, Blazers sa 1992, Suns sa 1993, Sonics sa 1996) gawas sa Utah Jazz nga ilang gikaabot og kaduha sa 1997 ug 1998.
* * *
May makabaraw ba sa nagpadayong paglambo sa duwa ni LeBron?, nga kun tapuk-an sa depensa aron nga dili makadarok sa goal, mahimong sayon ra ang mopasa nila ni Kyrie Irving, Kevin Love ug ubang sharp shooters nga nagkatag sa korte?
May makakandado ba sa opensa sa Warriors, nga gihulagway nga maoy labing maayo sa NBA karon?, nga kasagaran ang bugtong kapilian sa ilang kaatbang mao ra ang pagpili sa upat ka hilo, sila si Stephen Curry, Kevin Durant, Klay Thompson ug Draymond Green. Hinaot nga dili ta manghagok sa pagpaabot sa pagsugod sa NBA Finals karong Hunyo 1.
* * *
- Latest