Nangopya ni Duterte
Managsama og paagi silang Presidente Rodrigo Duterte ug House Speaker Pantaleon Alvarez sa pagduma og mga eskandalo sa pribado nilang kinabuhi: Angkunon nang daan ang ilang kalapasan, labi nang ilang mga atraso sa kaminyuon, aron nga masagang sa di pa moulbo sa publiko.
Malampuson kining maong paagi alang ni Duterte. Sa wa pa modeklarar sa iyang kandidatura sa pagka presidente, gikumpisal nang daan ang pagbudhi sa iyang asawa ug pagdungan niya og daghang hinigugma. Maong wa na mahatagi og importansiya atol sa kampanya.
***
Maong di mabasol si Alvarez nga nisunod sa iyang katagi-Davao. Aron nga di masentro sa nahiagoman karong kontrobersiya ang personal niyang kinabuhi. Tungod sa pag-ulbo sa ilang panagsungi ni Kongresista Tonyboy Floirendo:
•Giangkon nang daan nga daghan siya og anak sa gawas;
•Nikumpisal sab nga bisan kaduha na siya maminyo duna siyay laing babaye nga gikarelasyon karon;
•Niinsistir nga di siya kahukasan pagka abogado kay kun himuong sukaranan sa disbarment ang pagpangabit wa nay abogado nga mahibilin; kay
•Kumbinsido siya nga pipila na lang ka abogado ang way mga relasyon gawas sa ilang kaminyuon.
***
Apan lahi ni Duterte nga niladlad dayon sa mabulukon niyang relasyon sa kababayen-an, nauwahi na og diyutay si Alvarez:
•Naunhan siya sa hinigugma ni Floirendo nga si Cathy Binag nga nipahibawo sa media nga nasuko si Alvarez dihang nagkaaway silang Binag ug ang karelasyon rong Alvarez nga si Jennifer Maliwanag Vicencio;
•Nabangilan nang iyang kumpisal sa gibisto ni Binag nga nidangop nilang Floirendo ang asawa ug mga anak ni Alvarez tungod sa iyang pamabaye; ug
•Hagbay ra siyang ginganlan ni Duterte nga daghan og asawa.
***
Mas daling mapasaylo ang mga atraso ni Alvarez, gawas lang kun ang iyang uyab nakadaot sa iyang trabaho ug nakabuslot sa panudlanan sa katawhan, kun katuohan ang kumpisal. Nitug-an siya sa DzMM nga unom ang iyang mga anak sa gawas. Apan nisiwil ang mga detalye.
Matod niya sa kinatibuk-an walo ang iyang anak: Duha sa unang asawa ug upat sa ikaduha. Kun walo ang iyang anak, duha ray anak sa gawas. Kun unom ang anak sa gawas, 12 diay ang iyang anak ug may upat pa ka anak nga wa itug-an.
- Latest
