Bunga sa ambisyon

Sa nagpadayong hearing sa Kongreso mahitungod sa problema sa ilegal nga drugas sa nasud makapanglimbawot sa balhibo ang mga rebelasyon sa gipresentar nga mga testigo.

Kun tuohan ang ilang gipangbutyag, ang mga tinonto sulod sa New Bilibid Prison naglambigit, dili lang sa mga kurakot nga opisyal sa Bureau of Corrections, kun dili, apil na sa mga dagkong opisyal sa nasud.

Tiaw mo nga dili lang diay kutob sa kapolisan naka-penetrate ang sindikato sa illegal drugs, kun dili, nakagamot na diay usab sa Departamento sa Hustisya hangtod mikatay ngadto sa Senado, kun tinuod man ang pasangil sa mga testigos batok ni kanhi justice secretary ug karon Senador Leila De Lima.

Ingon niini kagamhanan ang salapi gikan sa ilegal nga drugas nga matud pa nakapalingkod og usa ka senador. Bisan og walay usa sa mga convicted drug lords ang direktang nakaatubang ug mitunol sa salapi ngadto ni De Lima, apan ang lead pulos nagtumbok nga nakadawat ang senador og kuwarta.

Si konbiktado nga si Jaybee Sebastian mibutyag atol sa pag-atubang niya sa Kongreso nga nakahatag siya og P10 milyones kang kanhi justice secretary De Lima nga gigamit sa kampanya sa election.

Hinoon, kining tanan mga pasangil lang hangtod nga mapasakaan og kaso ug makonbikto si De Lima sa hukmanan. Kun nahitabo pa nga dili si Presidente Duterte ang milingkod nga pangulo sa nasud, segurado nga "tuloy ang ligaya" sa mga durugista ug mosamot sa paglipang ang illegal drugs nga moabot na hangtod sa Malacanang.

Kun tinuod man, si De Lima lang kaha ang nakapupho sa minilyon ka pesos nga drug money? Halos tanang suok sa nasud nasudlan na sa drugas, ang mga local government units, ang tulo ka sanga sa gobiyerno nga naglangkob sa lehislatura, hudikatora ug ehekutibo, nasudlan na sa sindikato.

Dugay na kini nga nalili sa nakalabay pa nga administrasyon apan wala sumpoa sanglit mao kini ang gihimo nga gatasan sa mga ambisyoso ug ambisyosa nga mabutang sa mas taas nga puwesto sa gobiyerno. Karon pupoon na nila ang bunga sa ilang ambisyon.