Gubat batok drugas

Ang testimonya ni Herbert Colanggo batok kang Senador Leila De Lima mahimong kadudahan tungod kay mao kini ang piniriso nga gihukasan sa senador sa iyang kahamugaway sa pagpuyo sa New Bilibid Prison dihang justice secretary pa siya.

Si De Lima ang nagpaguba sa iyang luho nga puy-anan ug karibal sa laing high profile nga piniriso nga si Jaybee Sebastian nga gihulagway ni Colanggo nga paborito sa senador.

Si Justice Secretary Vitaliano Aguirre posibleng gigamit lang ni Presidente Rodrigo Duterte sa iyang laraw pagpatay sa political career ni De Lima. Sa laktod dili nato ikapadaplin ang dakong posibilidad nga ang mga gihimo ni Aguirre, sugo ni Duterte.

Ang testimonya ni Edgar Matobato kadudahan usab tungod sa pag-usab-usab niini. Gani dili man lang siya makapasabot sa iyang mga gipanulti sa Senado. Mahimo usab nga kadudahan si De Lima sa iyang pagpresentar kang Matobato kay kaniadto pa nga wala gayud siya makauyon sa dagway ni Duterte tungod sa iyang giingon nga daghan kini og nalapas nga tawhanong katungod.

Pulos kadudahan ang motibo ni Duterte ug ni De Lima. Kun ang gubat nga gilusad ni Duterte, gubat gayud batok sa drugas, ngano nga nakapuntareya ra man si Digong ni De Lima?

Ngano nga wala man niya puntareyaha pag-apil ang iya na nga gipangbulgar nga nalambigit sa narco-politics? Asa na man tuod ron sila? Wala ba sila hatagi og special treatment sa presidente?

Kun ang tumong ni De Lima mao ang mga kalapasan sa tawhanong katungod, nganong si Duterte mao ra man pud ang iyang gipuntareya? Wala ba diay posibilidad nga ang mga naghimo sa extra-judicial killings o summary execution mao ang mga kakompetensiya sa ilang negosyo nga ilegal?

Busa kitang katawhan kinahanglan nga dili magdalidali pagtuo ug paghukom sa atong mga nadungog ug nakita nila ni Digong ug De Lima, ug sa mga tawong nagpalibot kanila kay wala kita masayod kun kining tanan, tinumo-tumo lang aron masuportahan ang ilang mga pasangil sa usa’g-usa.