EDITORYAL - Tabang mo

Mura’g luoy ug makapahuyhoy abaga ang kataposang bahin sa State of the Nation Address (SONA) ni Presidente Rodrigo Duterte kagahapon didto sa Batasang Pambansa atubangan sa mga sakop sa Kongreso ug nakita sa telebisyon sa tibuok nasud ug ubang bahin sa kalibotan.

Ang unod niini mao ang kabahin sa mga “bilyonaryong drug lords” nga daw sa iyang paminaw malisod bisan sa sama kaniya pagpuo o ba kaha pagpapatay aron lang mahunong sila sa pagguba sa kaugmaon sa katawhang Pilipino.

Matud pa niya, high-tech kaayo ang maong mga drug lords nga nagbase sa gawas sa nasud nga wa niya hinganli sa wa usab hisayring kasayoran o ba kaha tungod kay dili na sakop sa iyang gahom kining mga tawhana.  Sumala pa niya, ipangtagak lang sa kalawran sa dagat ang binaril nga mga drugas nga butangan lang og tingali og tracking devices nga makita sa global positioning system pinaagi sa satellites aron haw-ason sa ilang mga koneksyon dinhi sa nasud nga maoy nagbaligya niini.

Kining maong impormasyon matud pang Duterte gikan sa intelligence community ug niangkon siyang dili kayahon sa Pilipinas pagpuhag kining problemaha ug nagkinahanglan kita og tabang sa Amerika, Uropa ug uban pang gamhanang mga nasud.

Kining problema sa ilegal nga drugas ‘global’ na kini ug kanser dinhi sa Pilipinas kay paspas kining nag-umido sa sud ug nameligro ang mga mosunod nga henerasyon kun dili kini dayon mapuhag.

Dili man siguradong makapanghilabot si Duterte niining mga drug lords didto sa abroad, apan di angay mawad-an og paglaom ug pagsalig ang katawhan sa abilidad sa presidente pagpuhag sa ilang mga gaway dinhi. Angay pa gani nga motabang na bisan ang mga yanong lungsoranon tungod ug alang sa kaugmaon sa kabataang Pilipino.

 Niining mga panahona kinahanglan magkahiusa ang katawhan aron tabangan si Duterte ug ang gobiyerno nga makabuhi kini sa talikala sa ilegal nga drugas nga pirmeng nagtangag og krimen ug kurapsyon.