Lahugay sa kapolisan

Padayon ang lahugay sa kadagkoan sa kapolisan sa Central Visayas ug pipila sa mga sinaligan ni Cebu City Mayor Tomas Osmeña ang girelibo ug tua gilagpot ngadto sa Mindanao. Gituyo kuno kini tungod sa gipakusgan nga kampanya batok sa negosyo sa ginadiling druga.

Giadmiter sa liderato sa Philippine National Police nga ang dakong revamp tungod kuno sa kalambigitan sa pipila ka mga opisyal sa kapolisan dinhi sa ilegal nga druga. Karon, pipila ka bag-ong nawong sa mga police officials ang nia madestino dinhi.

Misamot na hinuon pag-alburoto si Osmeña tungod niining maong kalamboan. Kini gumikan lagi kay wala na ang iyang mga batos sa kapolisan dinhi. Ug samot na nga dili na gayud siya mosuporta sa kapolisan sa ilang kampanya batok kriminalidad.

Kay aduna nay bag-ong opisyal ang kapolisan sa dakbayan, atong tan-awon kun mosulbong ba usab ang ilang kampanya batok sa kriminalidad. Basin baya kun mobahar na hinuon ang krusada unya mosiaw na usab kining mga bugok sa katilingban.

Hinuon atong hatagan sa atong pagsalig ug kumpiyansa kining mga bag-ong opisyal sa kapolisan sa Sugbo. Basin pa kun mosulbong ang ilang performance ug daghan na hinuong mga drug dealer ug tulisan ang madakpan ug manghay-ad.

Kun ako pay Mayor Osmeña, mas padayonon nakong suportahan ang kapolisan sa dakbayan bisan pa man sa pagkalagpot sa akong mga batos gikan sa Sugbo. Tungod kay ilalum man sa iyang pangatungdanan ang kapolisan, iyang katungod ang pag-atiman kanila.

Sayang bitaw nganong iya pang gitangtang ang mga incentives sa Cebu City Police Office. Dako unta kadto og ikatabang sa kampanya sa kapolisan pagpatunhay sa kahusay ug kalinaw sa dakbayan.

Dili nato ikalimod nga ang kalampusan sa kapolisan kalampusan usab sa lokal nga pangagamhanan sa dakbayan. Mao nang importante gayud ang suporta sa City Hall alang sa kadaugan sa krusada sa kapolisan batok sa kriminalidad.