EDITORYAL - Hakog sa gahum

Ang mga politiko dili gyud angay’ng mahadlok nga mohimo sa ilang katungdanan bisan og makaapekto kini sa pipila ka mga tawo nga hayan masuko ug dili na mobotar kanila sa eleksyon.

Angay nga hinumdoman sa mga politiko nga kun aduna may mga tawo nga mangasuko sa ilang paghimo sa tukma nilang katungdanan, apan mas daghan ang malipay ug nagpakahilom lang.

Sama sa proyekto nga pagpahiuli sa naandang gidak-on sa mga karsada ug kasapaan, angay kini nga ipadayon bisan pa man og nagsingabot na ang eleksyon.

Subo lang kaayo palandungon nga daghang opisyal sa kagamhanan, sama sa mayor, bise mayor, ug mga konsehal, apil na ang mga kapitan sa barangay, maglikay na sa paghimo niining proyektoha tungod sa kahadlok nga mawad-an sila og botos.

Ang kadagkoan sa Cebu City Hall mao mismo ang mibutyag nga aduna sila’y karaang mapa nga nahuptan nga magpakita nga ang gagmay na kaayong sapa dinhi sa dakbayan pagka karon, lapad kaayo kini kaniadto.

Migamay ang maong mga sapa tungod kay ang mga tawo nga mipuyo sa tampi sa kasapaan, mihimo’g riprap og gisibog ngadto sa taliwala sa sapa.

Ang mga karsada usab kaniadto nga lapad pa kaayo, nag-anam og kagamay tungod kay ang mga nagpuyo daplin sa karsada anam-anam nga misibog sa ilang panimalay ngadto sa aseras.

Ang pagkagamay na sa mga karsada nakatampo sa grabeng problema sa trapiko, samtang ang pagkagamay sa kasapaan nakamugna og paglunop ug pagbaha.

Kanus-a pa kaha makabaton og kaisog ang atong mga opisyal sa kagamhanan ug ilang kalimtan nga sa paghimo nila sa tukma nga gimbuhaton makahatag og kaayuhan sa kadaghanan sa wala’y paghuna-huna nga magkahulogan kini sa ilang kapildehan.