Anomaliya sa APEC

Niadtong mibisita si Pope Francis sa nasud sa Enero ning tuiga, liboan ka pulis ang gipakatap sa mga lugar nga iyang bisitahon sa nasud. Pipila sa maong mga lugar mao kadtong tua sa Eastern Visayas nga grabe nga naigo sa bagyong Yolanda.

Sa pagtugpa ni Pope Francis sa dakbayan sa Tacloban aron pagmisa alang sa mga biktima sa bagyo, hilabihan ka grabe sa seguridad. Ug sa iyang paglatas padulong sa lungsod sa Palo, gatusan ka pulis ang naglinya pag-secure sa kadalanan.

Sa atong nakita sa telebisyon, ulan ug init apan nagpabilin pagtindog kadtong mga pulis sa kadalanan. Gani daghan ang nakasaksi sa ilang pagkaon samtang sila nagtindog hawid ang plastic cellophane nga gisudlan sa kan-on ug sud-an.

Bilib ako niadtong mga pulis. Ilang gipakita ang matinud-anong pagserbisyo sa katawhan bisan sa ilang kahimtang. Ako silang nahinumdoman taliwala niining pag-deploy karon sa gatusan ka pulis alang sa Asia-Pacific Economic Cooperation meetings dinhi sa Sugbo.

Daghan sa mga pulis nga ania karon sa Sugbo alang sa APEC meetings ang naggikan pa sa silingang mga probinsiya. Kay sugo man sa propesyon, wala nila panumbalinga nga malayo sila sa ilang pamilya.

Apan subo usab nga palandungon nga sa ilang pagtuman sa ilang serbisyo, mitumaw usab kining mga makauulaw nga kontrobersiya. Usa niini mao ang reklamo mahitungod kuno sa ubos nga kalidad sa pagkaon nga gigahin ngadto kanila.

Nagkapuliki karon pag-eksplikar ang kadagkoan sa Police Regional Office-7 kabahin niining dako nga kontrobersiya. Ila kuno nga ipasubay ang mga nagsuplay sa rasyon sa pagkaon sa mga pulis kun unsa ka tinuod ang maong mga pasangil.

Nauna nang mitumaw ang anomaliya sa kantidad sa food allowance alang sa mga pulis nga gipakatap alang sa seguridad sa APEC meetings. Hangtud karon, daghan ang naglibog kun pila gayud ang salapi nga gigahin alang sa matag usa kanila matag adlaw - P150 ba o P200 o P300.

Angay lamang nga hatagan og daling aksiyon sa kagamhanan kining maong mga kontrobersiya. Lisod na nga modako pa kini ug nga mahimong sumsoman unya sa internasyonal nga komunidad kinsa mokansiyaw na hinuon sa Pilipinas ngano nga nagpatuga-tuga pa og host sa maong dakong katiguman.