Nag-abot sa Cebu

Nahimong battleground ang Sugbo sa dihang pipila sa mga presidentiables ang mibisita dinhi sa niaging mga adlaw. Sa ka alegre sa panghitabo, mora’g panahon sa kampanya ang sitwasyon, puno sa mga makabungol nga saad gikan sa maong mga pulitiko.

Domingo pa si bise presidente mitugpa dinhi sa Sugbo. Tuod man sa iyang pagpakighalubilo sa mga Sugbuanon, iyang gibatikos ang administrasyon ni Presidente Benigno Aquino III tungod sa iyang giingon nga pagpabaya kuno sa Sugbo.

Apan miinit ang panahon pagkaugma, Lunes, dihang miabot si Presidente Aquino inubanan ni Department of the Interior and Local Government Secretary Mar Roxas. Ug samot nang miinit sa dihang mibisita usab si Senadora Grace Poe sa maong adlaw.

Tuod man nabahin ang atensiyon sa mga Sugbuanon. Puwerte nilang ukaya sa dihang tulo sa nag-unang mga presidentiable sa nasud ang nag-iyahay pagpakita sa ilang karisma alang sa eleksiyon sa sunod tuig.

Samtang nakigkita si Presidente Aquino ug Roxas sa mga opisyal sa Liberal Party sa dakong katiguman sa Cebu Coliseum, kalma nga gisuhid ni Binay ang kabaranggayan sa mga dakbayan sa Toledo ug Talisay. Wala usab nagpalupig si Poe, kinsa nag-una karon sa mga survey sa mga posible’ng mokandidato sa sunod piniliay. Iyang atubang ang liboan ka mga estudiyante sa usa ka unibersidad alang sa pribadong panagtigum.

Kanilang tulo, si Binay ang mipaduol sa masa. Sa atong nakita, nakiggakos ug nakigsalo pa siya sa mga molupyo sa kabaranggayan, butang nga nahimo na siyang eksperto. Apan dakong pangutana kun mosaler ba kaha kini atol sa piniliay, ilabina niining mitumaw nga mga seryosong alegasyon sa corruption batok kaniya.

Hinuon sa umaabot nga mga adlaw, makapaabot kita nga magpiyesta unya ang mga presidentiables dinhi sa Sugbo, sama sa nanglabay nga mga eleksiyon. Kini ilabina sa panahon sa kampanya.  

Sa voting population nga mosubra sa 2.5 milyones, ang Sugbo maoy labing dako nga probinsiya panahon sa eleksiyon. Gumikan niini, maglumba na usab ang mga kandidato alang sa nasyonal nga posisyon pagdani sa mga Sugbuanon, kansang mga boto napamatud-an na nga crucial sa nanglabay nga mga piniliay.